兩日一夜澳門之旅 - Part 2

11 FEBRUARY 2014(TUE)

到左夜晚，當然係搵食時間，由於小豬爸話想去食自助餐，所以我地今晚就去左食自助餐啦~

澳門嘅酒店真係好多，要搵一間自助餐都真係幾難，有啲好嗁就有太多內地人，我地又點夠佢地嚟呀，所以我之前都上網搵過好多間，最後睇左好多OPENRICE嘅介紹，終於決定去英皇酒店入面食自助餐啦~

睇啲朋友仔介紹，話依間嘅嘢食都尚叫OK，都係比較斯文同靜嘅一間(即係比較少內地人)，就係因為依啲原因，我選擇左去依度食啦！

哈哈...原本我地係六人出發，因為細路係澳門返工，所以就可以嚟JOIN埋我地一齊食飯啦！

好啦...睇吓我地有咩嘢食先。基本上都係一般酒店嘅嘢食，不過佢地回得都算快，所以每一次行去都係滿滿的~

仲有廚師即場煮嘢食呀~

最令我驚訝就係，依度有得自拎可樂，我地加加埋埋都飲左差唔多二十支呀~

場內仲有現場音樂表演呀~

講真...啲嘢食都真係一般，不過我又覺得個氣氛都唔錯，其他賓客都食得好斯文(依個好重要)，我地都食得好開心呀~

食飽飽正餐嘅小小豬見到有雪糕又點會唔放過，佢仲好叻仔咁叫小豬媽帶佢出去拎，諗住有小豬媽撐腰嘛~

玩左成大半日，我地食飽飽就返酒店啦！

依個小小豬真係好熱愛酒店，就連去洗手間都會周圍望~

洗完白白，衫都未著就通床跳啦~

開頭仲以為小小豬會唔習慣，不過佢由床跳到去地下，再周圍走，之後又走返上床，完全都冇停過呀~

嚟得澳門，當然係要參觀一吓賭場。係永利酒店時，我同大肥豬就因為帶住小小豬，所以就冇入到去，係門口等小豬爸佢地。

我地住間酒店樓下都有一個賭場，原本我都打算留係房間照顧小小豬，等佢地出去行吓。後來小豬媽就叫我地去行吓，佢幫我照顧小小豬。既然小豬媽提意，所以就等佢地兩婆孫係房間溫馨吓，我地就去賭場觀摩吓啦！

哈哈哈...賭錢我就真係唔多識(同冇依個膽量)，所以開頭都係周圍睇人地玩。後來發現有啲係自助電腦大細機，可以細細地$5咁去玩，所以就同大肥豬玩左一陣。少少地咁玩，加上又冇其他人望住嘅壓力，又真係玩得幾開心，我仲好叻女咁......冇輸冇贏，拎一佰蚊出嚟又可以拎返一佰蚊走，唔輸我就當自己贏左啦...哈哈哈！

不過，小豬媽決定唔入嚟賭場都係正確，因為嗰度真係勁多人吸煙，空氣真係唔咁好呀！

《續待》