光波香蕉酥@小小豬三歲半啦

10 FEBRUARY 2014(MON)

又到左每月十號，即係小小豬又大一個月，轉眼間就已經三歲半啦！

原本依一個三歲半嘅重大日子，我地都打算買個小蛋糕返嚟同小小豬切吓開心吓。不過因為聽日我地就展開兩日一夜嘅澳門之旅，到時有好多好嘢食，所以今日就唔打算慶祝啦！

雖然唔慶祝，不過都要攪啲小活動玩吓嘛，所以我就同小小豬又嚟過親子廚，一齊整下午茶- 光波香蕉酥，睇吓等食嘅小小豬幾心急...哈哈哈~

其實之前都完全冇諗過可以光波香蕉，我見FACEBOOK嗰個光波爐食譜有波友整左，見到好似好簡單，所以就買齊材料同小小豬一齊整，親子一番啦！

整法都真係非常簡單，除左入爐嗰個步驟唔俾小小豬做之外，其實都係佢負責呀！

材料只需要依三樣~

先將一塊酥皮待溶化~

然後放上一隻已脫皮的香蕉~

之後用酥皮包實香蕉~

 先用200度預熱光波機，好一個等食嘅為食豬呀~

然後就以高架200度波25分鐘，由於係圓柱形，所以要不時反動，我就大約每邊6分鐘左右啦~

睇吓小小豬幾心急，全程都唔肯離開部光波機呀~

當見到變成了金黃，咁就食得啦~

小小豬等左咁耐，終於食得啦~

唔知係唔係因為剛剛出爐太熱了，所以小小豬都只係食左兩啖就唔食啦！

哈哈哈...唔緊要，小小豬唔食仲好，因為我可以食多啲嘛！我就覺得好好食，外脆內軟，而且又唔太甜，再加上依家凍凍地嘅天氣，食啲暖食物落肚，真係成個人即刻都暖晒呀！