泰式明爐烏頭魚

16 FEBRUARY 2014(SUN)

基本上我地每次去泰式餐廳，都一定會點泰式明爐烏頭魚，因為我地個個都鐘意食嘛！

不過，小豬媽就話其實整嘅材料都係一啲好平，但餐廳都要成差唔多二百蚊先可以食到，好似好唔抵。

就係咁...小豬媽就上網學整俾我地食，我地又有口福啦~

其實材料都真係好簡單，基本上去賣泰國材料嘅鋪頭都可以買到呀~

當然個重點係個魚爐，依個爐小豬媽係上海街買呀~

主要嘅材料都係泰國香草，有香茅、青檸、南薑、檸檬葉、指天椒及蒿頭，不過如果你唔識執，去鋪頭問店員話買煮泰式明爐烏頭材料佢就會俾你~

首先烏頭魚洗乾淨之後，用鹽奄大約25分鐘，之後洗乾淨蒸10分鐘備用~

依個時候就要準備整湯底， 將香茅、南薑、檸檬葉、指天椒、芹菜及莞茜洗淨切段，香茅一定要拍，香味才會出哦~

先用小小油爆香香茅、南薑、檸檬葉、指天椒~

再加上雞湯同魚露(十滴左右，視乎個人口味)煮大約20分鐘~

最後加青檸汁，就完成湯底~

煮好湯底，咁就要擺靚個餸啦，先將芹菜放在爐底~

再放蒸熟嘅魚上面~

再放埋啲莞茜及蒿頭，咁就差唔多完成啦~

當然要準備埋個火啦，其實係上海街賣爐嗰間度鋪都有啲易燃火種買，依一隻都係好安全，冇煙又冇味，所以都放心係屋企用呀~

點好火，就可以放碟魚上去~

加上湯煮熱就得啦~

不過，放湯唔好放太多，如果唔係當熱嘅時候就會漏，湯大約放碟嘅一半就得啦~

食得啦，真係同餐廳食嘅味道完全一樣，不過仲食多一種愛心味，因為小豬媽係為我地學整呀~

依個餸由於要熱騰騰先好味，所以建議大家係食飯前大約20分鐘就好放係個爐上面煮，咁開飯時就可以即刻食到唔洗等啦！

哈哈哈...唔知下次小豬媽又會學煮啲咩新餸俾我地食呢！