專心做功課

16 FEBRUARY 2014(SUN)

由讀PN到依家嘅K1，小小豬嘅學校都係屬於HAPPY SCHOOL，平日返學都係從遊戲中學習，功課都唔洗點返屋企做，返左K1都半個學期，都只係聖誕同新年嘅長假期先有功課做。

由今個星期開始，終於都有功課做啦~

當然，有功課做係有好有壞，不過係我立場我覺得好似依家咁少少地都係一件好事。有好多朋友仔都話，應該做多啲功課，咁就會學多啲嘢，小朋友就叻啲。

但我又覺得幼稚園階段，唔好有功課嘅壓力，等佢地輕輕鬆鬆咁上學，愛上校園生活。只要佢地鐘意返學，開開心心咁上堂就自然可以好快吸引到老師教嘅嘢啦！(依家小小豬都不知幾鐘意返學呀)

其實都唔係啲好特別嘅功課，比起其他朋友仔嘅功課真係簡單好多，因為只係每星期做兩版線條練習~

今次都算係小小豬第一次拎起支鉛筆嚟做功課，由於之前我地都有教過佢揸筆嘅手勢，所以都叫做OK，做得都幾好，仲做得好專心呀~

不過，塗顏色就依然係唔係太叻，成日塗幾吓就話完成，有時都真係激C人呀~

基本上小小豬都係自己做，唔洗我地點教，除左塗顏色方面錯少少之外，其他都做得唔錯呀。最好就係全程都好專心，希望以後(直到大個仔)小小豬做功課都係咁乖仔，咁專心唔洗我地勞氣就好啦！