第二次親子賣旗

15 FEBRUARY 2014(SAT)

我地成日都好想增加小小豬嘅人生體驗，參加多啲慈善活動，等佢見識多啲，所以成日都好想搵啲相關活動俾佢走玩吓。

今日又有機會去參加慈善活動，就係去親子賣旗啦~

對上一次我地親子賣旗足足有一年，係依段期間唔係我地唔想去做，只係因為我地搵唔到相關機構，所以咁耐先有第二次嘅賣旗活動~

今次我地都真係幾人強頂盛，小小豬一個負責賣旗，就有我地四個人陪，都真係幾勁呀！不過其實開頭小豬媽同LULU妹都只係負責幫我地影相，不過見小小豬咁開心同咁用心，所以又一齊玩埋一份啦！

因為經過一年嘅時候，小小豬比上次表現都有明顯嘅進步。

由於小小豬個高度關係，所以開頭都係要抱住等佢可以易啲等途人入錢同貼貼紙~

雖然都係抱住，不過小小豬都好熱衷，仲好大聲咁叫人買旗呀~

不過一輪WARM-UP之後，小小豬已經不甘抱住，要落地行去搵日買旗啦~

每當成日賣旗之後，小小豬都會有一個好興奮嘅笑容，我地係旁邊睇到都真係好攪笑呀~

雖然今日小小豬表現真係非常之好，不過因為天氣太凍，我又唔想小小豬同小豬媽係街上吹太耐風，所以我地就提早還旗袋，之後去食個豐富嘅早餐了。

經過今次賣旗活動，我地見小小豬真完全唔驚陌生人，仲識得同佢地溝通，見佢又好認真投入咁享受賣旗過程，真係大個仔左好多呀！

希望嚟緊可以搵多啲唔同種類嘅慈善活動，可以等小小豬再繼續進步，繼續豐富佢嘅人生經驗，好習慣係要由細個開始培養嘛！