香煎蜜糖金蠔

9 FEBRUARY 2014(SUN)

係年初三嗰日，小豬媽專程入流浮山一轉，目的就係去買啲金蠔返嚟，等今日一家人齊齊開心嚟我屋企食飯煮俾我地食。

等左大約一星期，終於食到我地期待已久嘅 - 香煎蜜糖金蠔~

近依幾年，小豬媽都一定會入流浮山金蠔，不過今年依啲又真係比往年嘅又大粒又肥嘟嘟呀~

小豬媽話買金蠔最好就係買啲仍然有少少濕身，即係大半乾少少濕，當然要睇埋佢夠唔夠肥美啦！有齊晒以上條件，咁就係最好食。

依個煮法係那位售賣姐姐教，其實同我地之前整嘅都係大同小異，不過佢教我地加左少少簡單調品，咁就會更加好食。加左啲咩？咪就係每人屋企都有嘅沙糖啦！

好啦...我地開始煮啦！

依啲金蠔係經過一星期係冰格保存，所以要拎出嚟解凍先。由於解凍同埋啲金蠔本身都係濕濕地，所以係煮之前需要做一個步驟，就係焗一焗佢，等佢表面乾身返少少，咁煮嘅時候就唔會爛同易煮啲啦！

不過由於我冇焗爐，所以我就用光波機做依個步驟。先200度預熱5分鐘，之後就每邊光大約2分鐘~

光完之後個表面係會乾身晒啦~

之後就可以開始煎啦！售賣姐姐教我地先煮肚嗰個位置，即係肚位"突"出嚟嗰邊~

油燒滾嘅鑊中煎至大概金黃色，之後就係每一隻金蠔上面放少少沙糖再煎一煎，兩邊同樣做法。不過要小心啲，因為加左沙糖之後係會好易燶，所以真係要好小心，時間要教得好好呀~

煎好之後，將所有金蠔回鑊~

之後再加上蜜糖不停炒，等每一隻金蠔都有蜜糖包圍住。依個時候都係要小心同快手，因為蜜糖亦都係好易燶呀~

就係咁好似好簡單，又其實都幾考廚功嘅香煎蜜糖金蠔就完成啦~

粒粒金蠔都肥嘟嘟，再加埋小豬媽嘅精湛廚藝，真係好味都唔識形容呀！

我自問都冇小豬媽咁好廚藝(真估一成都冇)，所以依個餸我都係做食嗰個啦...哈哈哈！

期待我地出年新年再入去買過靚金蠔，又可以再嚟食過啦！