初三新界遊 - 第一站：林村

2 FEBRUARY 2014(SUN)

每一年嘅年初三，我地都有個習慣就係由小豬爸車我地周圍去，遊吓新界行個大運。

今年當然唔例外，我地嘅第一個目的地就係，去林村探吓許願樹呀~

今年我地真係好好彩，竟然完全唔洗點排隊就可以泊到入去林村個停車場，$50兩個鐘仲要有兩個拋嗰啲吉仔(場內買要$20一個)同一個風車送，所以真係泊得抵呀！

入嚟第一件事，當然要去拋許願樹，許個願啦~

大家都好落力去拋，我同大肥豬都係一次就拋中，其他團友仔就要拋多幾次先中，不過個人認為唔好理拋幾多次，只要拋得到上樹，個願望都一定會實現呀~

有得玩小小豬又點會唔玩呀，不過佢唔夠高，最後就坐上大肥豬肩膀上拋啦~

玩完啲激烈活動，就去行吓街街，今件個市集比上年熱烈，氣氛好好呀~

其實啲店舖都主要賣吓自家蔬果、小食或者係啲新年用品，不過其中有一間賣泡泡槍，佢有一支可以噴到啲大泡泡出嚟，就係咁小豬爸就小小豬屋企冇大泡泡，所以就買左一支俾個百厭豬啦~

百厭豬見到風車又走去吹~

行個棚內我地就影吓相~

不過因為小小豬知道佢有支新泡泡槍，佢又點忍得手唔去玩呢。最後經小豬媽游說後，小小豬終於有得玩啦~

今年開闢左一個新嘅熟食地方，行到攰攰地嘅我地當然係要食小小嘢補充一吓體力先~

一般特式魚蛋、腸仔、炸鮮奶都係要$20-$30，雖然都比出面貴啲，不過都可以接受。但我覺得最過分就係一包250ML嘅檸檬茶(仲要係唔凍)，竟然要$10。雖然新年都明知啲嘢係會貴，不過又真係貴得有啲離譜呀！

食飽飽就去睇花車，不過因為都幾多人，加上大家又好似興趣不大，所以都只係搵小小豬至愛嘅迪士尼同MTR花車影相~

由於之後我地仲有好豐富嘅節目，所以就離開林村，向第二站出發啦！