CIAO! 點煮BLOG 體驗夜

9 NOVEMBER 2013(SAT)

繼尋晚去左迪迪尼電影分享活動之後，今晚我又有得去玩啦！

真係要係度公開鳴謝我個好老公，因為佢知道我有得出去玩時，都好願意放我出去，等我除左湊住個小小豬之外，都可以去見識一吓，順便去放鬆一吓。

所以連續兩晚都冇啖好食之餘，仲同小小豬係屋企博鬥，等我放心去玩呀！

今晚就係應點煮BLOG邀請，出席佢地嘅CIAO! 點煮BLOG 體驗夜~

今日我地活動地點就係觀塘嘅官中站，其實我都係第一次去工業中心嘅樓上店食飯，所以開頭都有啲緊張。不過原來外表就係一個工業中心，不過入面佈置都幾靚呀~

今次活動除左等我地一班BLOGGER互相交流之外，仲介紹點煮Blog簡介及意見交流。不過另一個特別就係由點煮網各負責人現場為我地烹調的意式晚餐，部分空運到港食材由意大利食品公司Buonissimo贊助。

所以一到場就見到各負責人好努力咁為我地準備食物啦~

我地邊傾邊等邊食，睇吓我地有乜好嘢食，好豐富呀~

除左個意粉之外(因為我唔食牛肉)，其他樣樣都好好食，可能係睇住佢地整嘅關係，所以食到嗰味道之外，亦都見到佢地好用心咁整，即刻覺得更加好味呀！

席間點煮網負責人為我地講解點煮網及BLOG嘅介紹，其實我之前都係點煮網申請左個BLOG BACK-UP，所以都會考慮之後係點煮BLOG都分享埋我個小BLOG。我都提出左希望可以係BLOG上允許一次過上載多張圖片，負責人表示都會好快就完成依個情序，咁就可以寫BLOG都會快啲同方便啲啦~

最後，大會仲請左一位食物攝影師嚟為我地進行食物攝影工作坊，教我地點可以將一份食物影得好靚咁放上BLOG同大家分享。原來簡單咁影一張相，都要考慮好多嘢，要擺得靚之餘，又要點綴得好，仲要配合埋光線，所以影一張靚嘅食物相都真係唔易呀~

雖然今晚活動比我預期中晏左少少，不過食到好食物，又可以學到影靚相，所以都OK啦！

原來點煮網各負責人都係廚藝高手，唔知佢地幾時可以開班，教吓我地煮嘢食呢？如果係我一定係第一個報名呀...哈哈哈！