兩小無猜

13 NOVEMBER 2013(WED)

嘩...人仔細細嘅小小豬開始去識女朋友仔，睇吓佢拖住女朋友仔笑得幾甜，仲開心過拖住我呀~

女朋友仔變左做HELLO KITTY係因為唔太方便公開佢個樣，如果睇左原圖嘅朋友仔一定會覺得依張相係好好笑，因為女朋友仔當時都係同小小豬對望，成個環境都係好SWEET，完全係兩小無猜FEEL呀....哈哈哈！

今次係第二次係巴士站撞到朋友仔，上一次就大家都係比較"生保"，不過今次就有少少熱情，大家手拖手等巴士~

仲一齊手拖手行返學添~

其實女朋友仔係同我地住埋同一個屋苑，因為我地搭嘅巴士班次唔同，我就搭早左一班，因為我想小小豬早少少返學WARM-UP一吓，所以就會搭早一班。

不過今日依個百厭豬食飯食遲左，所以迫住要搭遲一班車，不過就估唔到有依一個意外收獲，同朋友仔一齊開開心心搭巴士返學。小小豬仲同我講，話想聽日都同女朋友仔一齊返學，要我搭遲一班巴士添呀！

如果有見證小小豬成長嘅朋友仔都知道，小小豬都係一個極度怕羞嘅小朋友，社交方面都係比較弱，所以有時係公園叫佢拖其他小朋友手仔一齊去玩，小小豬都一定係唔多願意，或者拖一吓就走左去，所以今次竟然可以主動去拖住女朋友仔隻手仔，仲可以拖住咁耐，所以我覺得真係一大進步。