小小豬的大驚喜

3 NOVEMBER 2013(SUN)

今日下午我地三口子過左太古城，陪小豬媽食TEA兼SHOPPING，就係咁....小小豬又呃左小豬媽一份大禮物啦！

睇吓小小豬玩得幾開心~

事緣今日同小豬媽食完TEA之後，我地就去左行玩具反斗城(基本上都可以話係指定動作)，每次去到都一定去TOMY車仔嘅位置玩吓。

今次小小豬都玩左成十幾二十分鐘都唔肯走(好在當時冇其他小朋友)，叫佢去另一個位置玩又唔見願意，最後小豬話佢實在忍唔住，佢話見小小豬玩得實在太開心，所以要買俾佢返屋企慢慢玩呀！

雖然我都知小小豬係好鐘意，不過開頭我都係唔讚成，因為唔想俾小小豬覺得買玩具係一件好簡單嘅事。係小豬媽不斷游說後，見到小小豬知道有得買時嗰個既興奮又肉緊個樣，最後我同大肥豬都心軟了，答應買返屋企啦~

不過，原來買依個停車場係唔包車仔，所以我都買左兩部小車~

小小豬一知道我地俾左錢之後，佢個開心樣即刻出哂嚟，仲要自己拎返屋企，唔俾我地幫手，睇見佢三斤拎二斤個樣，真係勁攪笑呀~

原本打算返屋企先開嚟玩，點知心急嘅小小豬同小豬媽都話要即刻玩。

大肥豬同小豬媽好努力為佢地至愛嘅小小豬砌停車場~

完成啦~

依個心急豬當然要即刻玩啦~

仲同小豬媽一齊玩添~

唉....無底深潭開始，Tomica出啲咁好玩嘅停車場真係好毒，係毒我地啲媽媽不停買車仔同配件，點解小小豬會咁鐘意玩TOMY車仔呀！

慶幸小小豬都仲細，暫時唔識追款，同埋未知有其他配件，所以應該有一段時間唔洗咁快再繼續買。

不過就算再買都係要等佢乖仔先可以買，唔可以習慣咁輕易買到心頭好呀！