快遊迪迪尼

21 NOVEMBER 2013(THU)

我地今日又一齊入迪迪尼玩，感受一吓聖誕氣氛啦~

其實因為今日小小豬要去覆診，所以同學校請左一日假。好順利地覆診又唔係用左好多時間，所以小豬媽就提意入迪迪尼玩返一轉，因為佢好想同聖誕版米奇影相呀！

可能係聖誕佈置關係，所以都好多人同米奇影相，見咁多人都唔敢排，所以同唔到靚衫米奇影，唯有同城堡前嘅靚靚佈置影啦~

因為我地都算晏入去，為左想去玩多啲其他嘢，所以就冇去排公仔，所以今日都只係同左薑餅人影呀~

係大街上都有好多聖誕精靈同大家影相呀~

我地坐定定等睇巡遊~

開始啦，睇吓小小豬睇得幾投入~

話說之前幾次我地同小小豬睇巡遊時，都好想佢落場一齊跳舞。不過，依個細膽豬之之都唔肯。佐估唔到今次佢好主動，見到個表演者拎個樂器出嚟時，佢就去搵個表演者拎個樂器玩~

雖然佢拎完之後都係行返嚟我地身邊玩，不過都算行出左佢嘅第一步，所以我內心深處都係俾左個叻叻小小豬，相信玩多幾次佢就可以好享受一齊玩啦~

睇完巡遊，當然去小小豬至愛嘅小小世界啦！睇吓依個擦鞋豬拖到小豬爸同小豬媽實一實呀~

今次仲話唔同我坐，要同小豬爸同小豬媽坐添，真係俾佢激C，有佢地係度就唔要我啦！不過咁亦都係小小豬愛錫佢地表現嚟嘛~

小小世界之後就到小小豬心目中嘅重點，因為係食雪糕，依個為食仔又點會放過呀~

睇吓依張相嘅小豬爸，佢見到小小豬真係笑得特別燦爛呀..哈哈哈~

平日唔多願意分享嘅小小豬，竟然主動請小豬媽食雪糕。當然啦...係小小豬心目中係至愛小豬媽嘛(真令我有啲啲羨慕添)！小豬媽有小小豬餵，嗰一刻都不知笑得幾甜呀~

又一次證明為左食，小小豬真係乜都肯呀...哈哈哈。不過其實都係佢鍚LULU妹嘅表現嚟呀~

之後因為小豬媽有少少肚餓，所以去左附近個餐廳食少少嘢。雖然小小豬話飽飽唔食嘢，不過佢都好乖仔咁坐定定玩貼紙等呀~

其實由第一次同小豬爸入園玩過迷離莊園一次之後，每一次入園小豬爸都好想玩多一次，不過次次見都要係排好長龍，所以都冇玩到。 今次見都唔洗點排隊，所以有得玩啦，今次仲係小小豬第一次玩迷離莊園添~

其實開頭我都好怕小小豬會好驚，因為入面有某啲場景都係黑暗暗咁，又有幾個位都少少驚，所以我全程都捉到小小豬實。不過小小豬竟然推開左我，好似話我阻住佢睇咁，不過全程佢都好專心咁睇，只係某一個位佢輕輕捉左我一吓，出嚟之後仲笑笑口咁話好玩，仲話下次帶大肥豬嚟玩呀！

睇小小豬依個表現，我諗係唔係我對佢過份保護呢？佢開始大個，有自己嘅想法同感受。其實都係一件好事嚟，所以我都應該學吓放多少少手，等小小豬自己學習啦！

最後一個地點，就當然係去行吓SHOP，因為我想買份小禮物送俾朋友作。依個小小豬又自己揀埋一份添~

係離開迪迪尼時，小豬媽俾揀中接受訪問。入嚟咁多年都係第二次接受訪問呀~

今日雖然入園時間唔耐，又同唔到聖誕版公仔影相，不過一家人一齊玩之餘，又俾我見到小小豬越嚟越大個仔嘅表現，所以都係好開心嘅一日呀！