花栗鼠寶堡

29 JUNE 2013(SAT)

成日都聽朋友仔介紹話荃灣有個好大型嘅PLAYHOUSE - 花栗鼠寶堡，見佢地啲相個場地都又新又大，又有好多唔同種類，好似好好玩咁。剛好見花栗鼠有團購，所以就買左一SET，帶小小豬去玩吓啦！

成個六月嘅假日唔係天氣唔好就有嘢做，所以都左今日先帶到小小豬去玩，睇佢幾開心~

向大迷宮波波池出發~

玩左幾轉，休息一陣，玩啲比較溫柔活動先~

個傻豬仔話要玩過山車，真係辛苦晒大肥豬啦~

叫左小小豬玩好多次個充氣彈床，佢都話驚驚唔敢。點知突然間佢自己爬左上去，仲玩到唔肯落嚟。開頭都係大肥豬貼身陪佢玩，點知玩到最後....全程都係佢自己爬，真係俾大膽豬嚇親~

我都有陪佢玩左一轉，不過玩完之後真係攰都冇朋友，真係唔知個傻仔黠解咁好精力呀~

小小豬玩都成身濕晒，要成身由內至外都要換過晒先可以再繼續呀~

唔覺唔覺我地都玩左成三個鐘，雖然我地係買左全日任玩票，但越晏就越多人，所以我地玩夠就走。不過依三個鐘都足夠令小小豬同大肥豬冇晒啲體力啦！

小小豬就開心，不過我就真係有啲失望，因為同睇介紹同埋朋友仔嘅相真係有啲出入，首先個充氣彈床同埋個大型迷宮波波池都已經有好多地方係修修補補，頗為殘舊的感覺，乾淨度亦有需要改進。另外，基本上好似只係得收入場卷地方先有職員，場內都好難搵到一個職員協助，始終都係小朋友玩嘅地方，雖然係有父母在場，不過係唔係應該間唔中有職員巡吓，以免有設施有突然故障意外發生呢！

依啲都係只係我個人意見，不過依個場我都應該唔會再嚟，都係近近地去返J-PLUS玩仲方便呀！