兩母子拍拖遊迪迪尼

6 JULY 2013(SAT)

今日大肥豬要全日OT，全日同小小豬留係屋企，都真係會悶C人，所以都係要諗諗同小小豬去邊度玩先得。幾經考慮，終於決定同小小豬拍拖入迪迪尼玩啦！

哈哈哈...我地係第一次單拖帶仔仔去咁遠玩，講真開頭都有啲驚，不過凡事都有第一次，點都要試吓，所以就同小小豬出發啦！

一入到樂園，原本打算入怪獸大學睇吓係玩乜，點知勁多人，所以都唔敢排，最後去左同大眼仔影相。

平時係地鐵見到毛毛同大眼，都會好開心咁睇一陣先走。不過可能小小豬第一次見大眼，所以都好似驚驚地，唔肯單獨影呀~

WARM-UP左一陣，終於肯自己影啦~

之後我地就去玩小小世界，睇吓小小豬睇得幾專心。因為當時都冇乜人，所以我地仲可以坐兩次呀~

今日小小豬心情勁好，好少見佢同公仔係影得咁開心呀！基本上都唔多人，一隻都係排十五分鐘左右，所以我同小小豬影左好幾個人物呀！

好耐都冇同MINNIE影相呀~

MICKEY & MINNIE SO SWEET~

同MICKEY玩得幾開心~

仲有高飛呀~

影完相我地就去左睇巡遊，睇完就去玩飛碟啦~

正當我地打算玩完飛碟之後去玩水，點知一行到去玩水位置，突然落一場驟雨，好在當時我地都係有瓦遮頭地方，所以唔洗濕身呀~

未有得玩就休息一陣先啦~

停左雨就可以開始玩啦，個傻豬仔真係玩得好興奮呀~

哈哈哈...落雨就冇濕身，不過玩水就玩到成身濕晒，仲冇晒能量啦~

因為天氣唔穩定，怕之後冇咁好彩，所以都係同小小豬換衫走啦！

就係準備走時，見怪獸大學冇乜人，所以我地又可以入去睇吓啦~

小小豬一見到毛毛都不知幾開心，不停望住毛毛，好辛苦先影到張靚相呀~

原本打算整埋張學生證，不過小小豬唔肯入房仔影學生相，所以做唔到怪獸大學學生添。唔緊要啦，下次同埋大肥豬一齊入去時再影過，到時我地一家三口齊齊做大學生啦！

今日小小豬嘅表現真係俾我預期中好，好乖好聽話又冇扭計，睇小小豬啲相笑得咁開心，佢應該係玩得好盡興！不過一個人帶住咁多嘢又要照顧小小豬，所以我就真係攰好多呀！

有左依一個經驗，相信嚟緊暑假期間可以多啲小小豬入嚟玩呀！