清水灣第二灘

8 JUNE 2013(SAT)

今朝早見天氣都真係唔錯，所以食完早餐就一早出發去沙灘玩啦！

我地九點左右就去到，諗住早啲去可以唔洗咁囇嘛！不過原本太陽都真係好勁，已經曬C人啦！好唔容易先可以搵到個比較遮到太陽嘅地方玩~

直到依家小小豬都仲係怕海水，唔敢落水玩。所以玩左一陣沙之後，我地就慢慢咁引佢行出少少近海地方玩。首先大肥豬就執左一支樹枝，教小小豬畫圖形呀~

畫左一陣，小小豬開始可以越行越前，所以大肥豬又有個花灑仔引小小豬玩水啦~

最後，雖然小小豬都仍然未肯落水玩，不過見佢都開始對海水唔太抗拒，可以玩到成身濕晒，仲肯行到去海邊添(當然一見到啲浪花時，即刻走啦)~

今日都算有啲啲成效，都算係向前行左一大步。所以嚟緊我地都會帶多啲佢去沙灘玩，目標就係依個暑假令小小豬唔再怕海水，如果可以落埋去游水咁就仲好呀！

努力呀...希望好快可以同大家分享小小豬嘅游泳樂趣啦！