家長講故事

5 JUNE 2013(WED)

上個月尾，小小豬學校出通告邀請家長參加「家長講故事」活動，家長可自由參加，而每位參加的家長有十五分鐘時間向小朋友說故事。

開頭我都有少少驚，驚唔識控制成班小朋友。不過考慮左一陣之後，我都係決定參加左依個咁有意思嘅活動。

就係咁...今日小豬媽就陪我一齊返學校講故事啦！(小豬媽一齊去除左係等佢見吓小小豬上堂情況之外，都係想叫佢幫我影低我講故事嘅情況，等我可以留一個紀念)

之前因為想俾個小驚喜小小豬，我完全冇同佢講話會去學校講故事嘅事。當佢見到我同小豬媽入課室時，佢都好興奮又激動咁同我地SAY HELLO。不過，老師開始介紹之後，小小豬又好乖咁返回座位坐定定，完全冇話要扭計跟住我地，所以真係有少少喜出望外，小小豬點解係學校好似乖啲咁呀！

開始故事時間啦~

講嘅時候真係好緊張，不過小朋友們真係好乖，好留心聽我講，當我問佢地問題時都俾左好多反應我，證明佢地都係理解我所講嘅故事。當你見到佢地個個眼睛都係好專心咁望住你嘅時候，嗰一份成功感真係難以形容嘅興奮呀！

一早已經準備左啲小禮物，等我講完故事之後送俾小朋友。老師建議由小小豬負責送，開頭我都好擔心小小豬唔能夠完成任務，始終佢到依家都唔係太可以同人分享，仲要叫佢一個一個小朋友咁送，真係有啲擔心呀！真係難以相信，老師叫佢一次，小小豬就完全好合作，仲識得雙手送俾小朋友，真係令我勁開心呀~

送完禮物，就有另一個活動啦！

事緣我報名今日嚟講故事，都冇PLAN過時間，只係隨意咁揀。真係夾到冇咁好，就係今日我送完小小豬返學之後，睇到小豬媽個FACEBOOK先知，原來今日係小豬媽嘅農曆生日（我地依啲時代人，當然只係會記新曆啦！），所以當我入課室講故事嘅時候，就問老師可唔可以講小朋友們唱生日歌俾小豬媽，俾佢一個驚喜。當然老師係好幫忙，所以就係咁，我地一齊俾左個小驚喜小豬媽啦！

哈哈哈...當小豬媽聽到依個生日小驚喜時，真係開心笑唔停呀！原本係錄低左小朋友唱歌時候嘅樣，不過我覺得唔太方便將佢地嘅樣子放上嚟，所以我就自行加工，整左依個小片段啦~

最後，老師為我地影張大合照，就係咁開心嘅一個講故事時間又完成啦~

哈哈哈...見到小朋友嘅表現，我已經覺得好開心，係一個好好嘅體驗，不過當離開時老師仲誠邀我下星期再嚟講多次，嗰一刻真係感覺到前所未有嘅成功感！亦都因為玩得開心講得興奮，我又再報名下星期再去講多次故事啦！

依家又要開始做功課，諗吓講咩故事，送咩小禮物好呢....又再一次期待啦！