係我朋友堆中，如果佢地有仔仔嘅講，基本上絕大部分都係會玩THOMAS火車頭。其實THOMAS火車頭都唔係啲什麼唔好嘅玩具，只係佢出嘅花款實在太多，加上一部小小嘅車都賣成幾百蚊，如果沉迷起上嚟，都真係唔嘢少呀！
所以由小小豬開始玩玩具嘅時候，我地都係唔會俾佢同THOMAS有任何親密接觸，唔想佢中THOMAS毒，到時我就麻煩啦！
不過.....世事又點會係我咁諗得咁好呀！事緣上幾個星期大肥豬帶小小豬落公園玩，見到個大哥哥玩緊THOMAS佢就行埋過去望住哥哥玩，次後仲同哥哥一齊玩左一陣。就係依短短幾分鐘就出左事，返到屋企就成日提住THOMAS火車...THOMAS火車，行玩具反斗城時又行埋去THOMAS專區睇好耐(不過佢又好乖冇叫我地買，只係用充滿渴望嘅眼神望住)。
終於小豬媽都忍唔住買左幾部俾THOMAS火車俾小小豬啦(又一寵孫事件...哈哈哈)~
睇佢見到THOMAS火車個樣幾開心~
拆完晒玩具就乖乖坐定定係度玩啦~
唉...就係咁，小小豬就加入成為THOMAS火車FANS行列啦！
不過，暫時我都只係放左兩部車俾佢玩，唔想一次過拎晒出嚟等佢覺得太易得到，唔會學識珍惜，同埋太過沉迷。等佢乖乖嘅時候，我就會慢慢開放多幾部俾佢啦！
沒有留言:
發佈留言