既驚又喜的一星期

1 SEPTEMBER 2012(SAT)

 

對上一個POST都已經有成個幾星期，唔知大家有冇掛住我同小小豬呢？依個星期簡直可以話係過左一個既驚又喜又忙的一星期。

等我先講件開心事先(我個人覺得)，就係我已經同我工作九年多的地方SAY GOODBYE啦~

其實依一份工真係我做得最耐嘅一份，亦都經歷左我好多嘅人生大事(結婚同生BB都係依度做)，所以我亦都曾經想過依一份可能係我最後一份工。不過........我真係做得好唔開心，處處被受針對，冇中生有，亦加上日久見人心，所以成日帶埋啲負能量屋企。最後大肥豬都叫我唔好做，唔好成日受埋啲冤屈氣屈出個病來。就係咁，我就放棄左依一份人工都幾OK嘅工，依家暫時全職照顧小小豬同小豬媽先，隔多幾個月等小豬媽身體康復先再去搵工。不過話唔埋我愛上左做FTM呢...哈哈哈！

至於驚同忙嘅事，相信有睇我微博嘅朋友都知道，就係上星期一小豬媽就需要入院做一個大手術。

其實之後小豬媽做完療程嘅時候，我地都估到係需要做手術，不過我地當時都冇估計都個嚴重性同危險性。點知係覆診時，醫生同我地講解時真係嚇左一跳，所以真係俾佢講到驚左好耐。

不過...一切都已經擔心完，小豬媽手術亦非常順利，仲比醫生預計之內好好多，安安全全咁完成，所以都真係放下心頭大石。嗰幾晚真係全天後係醫院陪住小豬媽，亦都係第一次小小豬唔係我身邊同我一齊瞓，所以都真係勁掛住俊傻豬仔呀！不過睇住小豬媽一步步咁康復，雖然有少少辛苦(因為夜晚唔敢瞓)，我都係覺得值得呀！

依家小豬媽都已經出左院返屋企休息，所以大家都可以放心了。

依一個星期都有少少事開心事發生，等我慢慢有時間再同大家分享，始終FTM嘅私人時間係少啲嘛！