光波第一激

24 SEPTEMBER 2012(MON)

 
光波機都相信已經HIT左一段時間，當初初推出時，我都已經好想買部嚟玩，奈何大肥豬話阻地方之際又怕我係三分鐘熱度，所以一直都只係得個想字，不過今日終於有得玩啦！

因為嘉汶表妹轉贈左部光波機俾我地呀~

YEAH...我同小豬媽都有新玩具玩啦~

因為要試機關係，所以今日就先嚟整個簡簡單單嘅『光波雞翼』作為開機之作啦~

雞翼進行中~

完成啦，個賣相都真係唔係差呀~

某程序上光波機真係幾方便，我只係好簡單咁先用左叉燒醬醃一個鐘，之後焗左八分鐘一面，到一面就再焗五分鐘，咁就完成啦！整出嚟個味又真係唔差，熟得嚟又唔算太乾身，都有少少汁係啲肉入面，仲有啲BBQ嘅味道添。

我見介紹話光波機仲可以烤、煮、燒、煎、蒸、焗、烘、炸、燉甚至解凍，我就未試，有機會可以一樣樣咁試吓先。不過，我同小豬媽都話下次試吓整豬頸肉or燒肉，一於向難度挑戰，希望到時都可以成功啦...哈哈哈！