百厭豬

21 SEPTEMBER 2012(FRI)

 

尋日同小豬媽覆診，之後我地過經CITYSUPER，小豬媽就話想入去行吓。我見佢精神都幾好，加上醫生都叫佢行多啲，所以就入去行左一個圈。

就係因為行左一陣，小豬媽就買左樣嘢俾小小豬，就係依包ABC粉粉啦~

小豬媽知道小小豬好鐘意啲英文字，所以就即刻買左一包，話小小豬見到一定好鐘意食~

小豬媽仲好有心機咁，買左啲魚魚瘦肉煲湯，等啲粉粉甜啲，小小豬可以食得開心啲~

點知....小小豬放學返嚟見到啲粉粉，係就係好開心，仲咁邊睇啲字嚟讀，不過佢就完全唔肯放入口食，餵佢時都完全唔肯張開個咀~

最後，我地用盡方法，小小豬都係唔肯食，為左唔好要佢餓親，所以小豬媽就話要即刻煮碗飯俾佢食。真係俾依個小小豬激C，小豬媽一番心機煮個新款式俾佢食，點知佢又唔肯食。

都真係唔明白，一向小小豬都係好鐘意食嘢，平日閒閒地都食完一大碗粥粥之後，都可以再食一電通心粉(因為見到我地食通心粉午餐，又要食埋一份)，點知見到啲英文字母粉佢就唔食。小豬媽話估計佢都以為嗰啲係唔食得，以為係玩具，所以點都唔肯食。

經過今次，之後真係唔敢再買啲新嘗試俾小小豬試啦！