25個月啦

10 SEPTEMBER 2012(MON)

 

又過多一個月，小小豬已經25個月大啦！

為左慶祝依一個好日子，小豬媽買左盒小小豬至愛嘅士多啤梨等佢放學返嚟食，睇吓個為食豬食得幾滋味~

仲招招積積添~

個傻豬仔唔知諗緊乜呢~

依個小小豬真係好識冧小豬媽， 好SWEET呀~

小小豬又大一個月，即表示佢已經返左學有一個月啦！

初初小小豬好似未太識應返學咁，係學校都會扭計同唔多聽老師話，每日送佢返學都係喊住入學校，都講真.....開頭都真係有啲咀喪，唔知有乜方法先可以令小小豬乖乖，唯有就日日都多啲同佢講學校好開心嘅嘢，希望有改善啦！

不過返左一個月，小小豬已經開始習慣學校生活，起碼依家送佢返學時都冇喊(不過我仲未可以同佢好開心咁SAY BYEBYE，次次都係偷偷地走)，剛剛班主任老師都打電話同我講小小豬個學校生活，佢都已經有好大改善，已經可以坐定定，又唔洗扭老師抱抱，上音樂堂又可以跟住一齊跳舞，遇到鐘意嘅活動都識得好開心咁去做。

不過，小小豬有進步都要多謝老師耐心咁教導。講真，我開頭都有擔心過一班有咁多小朋友，老師又點可以個個都照顧到呢？不過自從我係學校見過老師照顧小朋友嘅情況，再加上老師每星期都幾個電話同我傾，令我知道老師真係有去了解小小豬所面對嘅問題，亦都會同我傾點解決，所以我都好放心將小小豬交俾老師呀！

聽到老師都算讚小小豬，真係放下心頭大石，雖然仍然有需改善嘅地方，不過知道小小豬係有進步，真係一種好大嘅鼓舞，我要繼續努力教好小小豬呀！希望小小豬KEEP住可以繼續有進步，慢慢咁愛上返學啦！