鋼琴大師

3 SEPTEMBER 2012(MON)

 

今日放工，大肥豬又拎左一大盒嘢返嚟，係買俾小小豬嘅，原來係一部大型電子琴嚟呀！

如果有見證小小豬成長嘅朋友，都應該記得我曾經講過話係小小豬未出世之前，大肥豬都已經想買部琴俾佢，俾小小豬學吓彈琴。當然俾我反對左啦，因為小小豬仲細，都未知係唔係對彈琴有興趣，所以當時(小小豬約八個月時)就買左個玩具琴仔俾小小豬玩，睇吓佢個情況先慢慢決定。

唔覺唔覺部玩具琴仔都玩左一年有多，最近都開始壞壞地，大肥豬見小小豬都好鐘意玩，所以都話要買過一部。

開頭我估都係買過另一款玩具琴，不過估唔到效率何其高嘅大肥豬隔左一日就買左返嚟，仲係買左一部大人用嘅琴俾小小豬玩呀！

雖然有啲驚訝(咁大部)，不過見小小豬玩得咁入神，所以都未嘗唔係一件好事嚟呀~

坐係度真係好認真咁呀~

哈哈哈...依家屋企又多一個地方俾小小豬佔有左啦！

買依部琴都有另一個好處，就係除左俾小小豬彈之外，我都可以彈吓，咁可以係我彈琴時小小豬唱歌又跳舞，都係另一種親子活動呀！