預祝父親節晚餐@綠茵閣 - 食物篇

16 JUNE 2012(SAT) 

一個星期前，小豬爸竟然話想去食自助餐嚟慶祝今年嘅父親節。雖然我都唔你好想，因為自助餐對小豬媽嚟講真係好慘，佢只可以睇住我地食好嘢，自己又冇乜嘢可以食到。不過既然小豬爸咁興致勃勃，小豬媽又話OK，加上又係爸爸節，爸爸大晒嘛，所以去食自助餐，等大家開開心心啦！

雖然我地提早一日食，不過好多都FULL左，如果有位嗰啲都要差唔多六百蚊一位(好似貴貴地嘛)。最後，我係BK討論區見到有啲媽媽介紹，話北角城市花園酒店嗰間「綠茵閣」的自助餐都算幾抵食，平均都係四百蚊一位，啲嘢食都話幾好，所以我就決定BOOK依間啦！

其實當初我決定去依間我地驚驚地，雖然睇到啲介紹都話OK，不過始終感覺城市花園酒店印像好似舊左啲，同埋好多強國朋友住，所以都好驚影響個質量，如果食得唔好又怕屋企人會唔開心。

可能冇期望反而更好，我地一到去都覺得個地方環境好好，都算幾舒服，啲服務員都好好，尤其係佢地幫我換碟嘅速度，同埋佢地個態度真食唔錯。因為依個百厭嘅小小豬係臨走時唔小心倒瀉水，個清潔姐姐仲笑笑口咁掃，當我同佢講唔好意思時，佢仲話：『唔緊要，小朋友係咁啦！』。

好啦等我講返啲嘢食先，冷盤都有好多：魚生【尤其係帶子，勁甜呀(唔記得影相)】、凍大頭蝦、長腳蟹、冰螺、青口、原隻麵包蟹，樣樣都唔錯，仲好新鮮添~

 熱盤都算多選擇，不過因為我冇乜點食，所以唔多知味道如何。不過佢地都過幾好，尤其係鐵板燒大蝦同帶子、羊脾同西冷都唔錯呀~

蛋糕種類都唔算多，不過都OK，雪糕仲係Haagen-Daz嚟添(不過又係掛住食冇影相)呀~

仲有飲品供應添~

 今日依餐都真係算唔錯(雖然冇生蠔食)，不過以四百蚊一位嚟講都算係咁OK啦！最重要就係我地個個都食得好飽飽，仲食左一個開開心心嘅晚餐嘛！

今個POST就我主要講食物，等我呃吓POST先(HEE....HEE)，下個POST先同大家分享小小豬嘅我地嘅開心食相！