親子裝

10 JUNE 2012(SUN)

趁今日係小小豬二十二個大，所以就買左少少嘅嚟慶祝一吓(其實係買嘢嘅借口...哈哈哈)，就係我想買左好耐嘅親子裝啦~

依套我係屋企樓下一間小店買，當時係做緊結業優惠，三件加埋都係三百蚊多少少。雖然我唔肯定係唔係真係正版，不過個質地都幾就OK，最重要就係我鐘意嘅親子裝嚟嘛！

我就好鐘意，不過小豬媽話我唔應該買黑色俾小小豬，因為依隻豬實在太怕熱，黑色又吸熱嘅，怕小小豬著上身會唔舒服。雖然我都知道黑色係吸熱，不過佢嗰句『I LOVE MUM』真係好啱我心水，所以自私少少都要啦，最多等太陽伯伯唔多勤力時先著啦...HEE HEE！

同場加映：

早前托朋友買嘅兩套波衫父子裝，送俾大肥豬做父親節禮物呀~

不過因為係朋友清貨價，所以就係冇乜款揀囉，其實我都唔知依兩隊係乜球隊，總之有啱佢地兩個嘅SIZE就買！

哈哈哈.....兩父子一齊著去公園玩肯定型爆，希望今個星期日會好天，咁佢地就可以一齊！