「頭」入迪士尼黑色世界 ~~ 夜場

8 OCTOBER 2011(SAT)

糖糖入到嚟，就即刻捉佢陪我去飛一轉太空山先，計計吓我都有成兩年幾冇飛過，今次再飛真係好刺激呀~

哈哈...我地入到幻想世界，第一時間就去拎糖啦~

之前問左CAEMEN知道六點左右就會有DUFFY出嚟影相，所以飛完太空山之後，我地就即刻走去排隊，等左大半個鐘左右啦，不過DUFFY真係好靚勁鐘意呀~

之後我地就分頭行動，小肥肥就去睇夜光巡遊，我同糖糖就入大街酒店嚇鬼。雖然依間鬼屋前幾年都入過兩次，都知道啲佈置係一樣，都唔恐佈，但都唔知點解到入屋前都好驚，不停捉實糖糖。不過入到去就完全係兩回事，真係一啲都唔驚，只係覺得好好笑，因為啲鬼鬼佢地主要工作都係指引你繼續行，唔多嚇你呀..哈哈哈~

玩完鬼屋，之後我地就匯合返小肥肥，同大街啲鬼鬼影相。同佢地真係影左好多相，仲好好玩添~

同大街鬼鬼玩完，繼續去探險世界嚇鬼，依度啲鬼個樣雖然係恐怖啲，不過都係一樣唔會嚇人，只係同我地影相呀~

當我地行到去旋轉木馬附近，剛好放緊煙花，我地停低睇左一陣，啲煙火真係好靚，同地我嘅距離好近，好震撼。我地都一致覺得依個位置睇煙花係比城堡前睇仲正呀~

我地繼續周圍行，見排米奇嘅人唔多，所以又排埋一份，陪糖糖影米奇(其實係我想影就真..哈哈哈)~

好快就嚟到最後一個活動，就係同糖糖入新嗰間馬戲團鬼屋。我地排左半個鐘左右啦，就入到去玩~

之前都睇過啲朋友仔講話依間鬼屋完全冇料到，一啲都唔驚。不過可能佢個主題係冇頭關係，所以感覺都真係唔係咁好，佢地負責扮鬼啲工作人員係唔多嚇你，不過佢地SET左啲機關就好嚇人，同埋成個環境都好有迫壓感。我原本係同糖糖平排行，行行吓我地躲左佢後面，唔敢睇嘢，因為真係驚驚地。唔好話我，就連平日勁大膽嘅糖糖出到嚟到話驚，咁你就知啦！

玩埋依個鬼屋，時間都差唔多，迪迪尼到開始趕人，就連我地想再入SHOP行到唔俾，所以我都都走啦！

今日真係玩到勁攰，成日都好似只係行行行、排排排，可以話得返半條人命。雖然係咁，不過真係玩得好開心呀！

嚟緊我應該好快會再入嚟多一次，因為要帶小小豬入嚟影相嘛，不過到時就應該只係玩日場(夜場...當然唔啱小小豬啦！)。今年啲南瓜佈置咁得意，所以我都好期待同小小豬入去影靚相呀！