7TH CPDA

2 OCTOBER 2011(SUN)

話咁快就嚟到第七堂啦！

唔知係唔係上堂冇返學，小小豬一入到課室好似有啲陌生，唔多願意去玩玩具，最後要大肥豬陪佢一陣，先肯自己玩呀~

返左咁多次學，小小豬成日都係自己同自己玩，今次終於有得同學仔交流吓，大家用佢地嘅BB話講嘢，真係好似傾到有文有路咁呀~

玩左一陣玩具就開始上堂，今日開始有一位新老師教，所以開頭都同小朋友玩吓樂器唱吓兒歌認識一番先~

今堂主要教『手仔』，係老師講課嘅時候，小小豬都好似好留心咁望住老師。當老師行嚟做啲互動活動時，佢都好主動配合呀~

老師就俾左啲牙刷仔海棉俾小朋友接觸，等佢地感受一吓啲觸感~

學完『手仔』又係時候練習行路，同之前一樣都行得幾好啦~

之後又嚟玩新嘢，老師叫小朋友利用手指仔當畫筆塗顏色。依個小小豬完全唔怕啲顏料，仲好似好專心咁塗添~

大肥豬話要俾佢自由發揮，所以就只係輕輕咁捉住佢對手，主要係怕小小豬將隻污穢手放入口，睇佢又真係好似好專心又識得塗咁哦~

依一幅就係小小豬嘅佳作，雖然係唔多靚，不過佢對啲顏料唔抗拒，又肯自己塗，都算叻叻啦~

今日整體上小小豬表現都算OK，只係間唔中要自己爬去玩課室旁啲波波度玩，不過佢冇扭計我都覺得可以接受啦！