識認ABC

4 OCTOBER 2011(TUE)

今日放工返到屋企，小豬媽就即刻開佢個電話俾左依條片我睇~

一睇之下，嘩.....小小豬真係好叻仔，啲音都讀得很清楚呀。小豬媽都唔係順住嚟問，小小豬都識得答，咁即係唔係『唸口簧』，真係好似認得到啲英文字母咁樣呀。雖然都只係得幾個英文字母，不過以一個一歲人仔嚟講都已經好叻叻啦！

平日我地除左有俾小小豬睇教ABC嘅DVD學英文之外，原來下午嘅時候小豬媽都有同小小豬玩ABC遊戲，又好耐心咁教，所以先對啲英文字母有興趣呀！所以小小豬可以認識啲英文字，小豬媽都有好大功勞呀！

不過話時話...依排小小豬真係乜玩具都唔玩，只係鐘意玩依啲英文字母。曾經試過收埋啲ABC係床上面，佢都要爬上床搵返啲字母嚟玩。係屋企行到邊個位置，身旁都總係會幾隻字母，有時真係俾佢笑C呀！

小豬媽話難得小小豬對啲英文字母咁有興趣，所以小豬媽都話會繼續教多先啲，以小小豬可以快啲認得晒26個字母為目標呀！(當然係會慢慢嚟，唔會強迫啦！)

小小豬要加油啦！