靚太廚房終於開爐啦

1 OCTOBER 2011(SAT)

睇返依個靚太廚房系列，都真係有一段好長....好長...時間都冇出新POST，睇返對一個POST，都已經係09年嘅事，當時都未有小小豬！
其實之前我間唔中都有煮吓飯仔，不過煮嚟煮去都係嗰幾樣，所以都費時POST出嚟，驚俾大家笑我冇嚟新意。之後因為小小豬來臨嘅關係，煮嘅次數真係越嚟越少，加上一至五晚餐又有小豬媽負責，星期六日又懶懶地唔想煮，所以話入廚真係少之又少。

不過今日終於化身一個賢妻良母，煮左一餐好餸出嚟啦~

哈哈...其實我有依個動力都係因為小小豬。事緣前幾日同小豬媽講起，佢話小小豬都已經大個，可以飲多啲湯水，只要小小豬飲嗰啲唔落盬，就可以飲得，仲話有多啲湯水可以等身體強壯啲。

見今日係屋企都冇乜特別嘢做，又有時間，所以就好想煲個靚湯俾小小豬飲，等我都做返一個慈母。雖然小小豬都試過飲小豬媽靚湯好幾次，次次都係老火湯嚟。不過我自己就第一次煲俾小小豬，所以就簡簡單單嚟個蕃茄薯仔豬骨湯先，補補小小豬啲腳骨力，等佢行得好啲嘛(其實豬骨好似同腳骨力冇關係哦...哈哈哈)~

煲左個靚湯之外，仲煮左兩個餸，先嚟我個招牌菜...蠔油冰糖炆雞翼~

再嚟多個....魚鬆炒豆角~

煮依個餸真係好有成功感，因為我事前煎個魚餅時，係冇煎燶到呀。不過美中不足就係我切嘅時候因為太熱，所以切得大舊左，食嘅時候好似唔太方便(不過個味依然係好好食....哈哈哈)。

依個為食小小豬見到我地食飯時佢又冇嘢食，佢又點會唔扭計呀。所以我另外整熟左個半薯仔，之後切一粒粒，等小小豬一粒粒咁放入口，有得食之餘又可以訓練一吓手指仔~

小小豬真係好開胃，食飯前已經食左粥粥，都可以食到大半碗薯仔之餘，仲飲左一大碗湯，真係好叻叻呀！

睇見小小豬咁鐘意飲湯，真係好有滿足感，所以我都係時候多啲自己煲吓湯煮吓飯仔，等小小豬欣賞吓我緊餘嘅廚藝先得。