期待已久嘅SOGO FACE終於今日去影啦！
講真，其實我對依輯相都幾抱期望，因為見到好多去影完返嚟嘅朋友仔嘅相都好靚，個個小朋友都笑得好自然，加上依間都算係大公司，所以都有啲信心。
雖然我係好期待，不過自上次影過第一次STUDIO之後，我真係唔敢抱太大期望。因為當攝影師哥哥同我地影相時，依個小小豬成日都扮COOL，只係識CHOK樣，點引都唔笑，反而影完張相先嚟『月亮眼』，你話係唔係激C呀！不過今次我地同埋小豬媽一齊去影，希望會好啲啦！
由於今日都算幾多人影，所以都要等一陣。係等嘅時候，依個小小豬精力勁充足，係張椅上自己同自己玩得好開心，嗰一刻真係好想講：仔仔，你留返啲精力影相用啦~
今次有兩位哥哥幫我地影相，一位負責影，另一位就負責引小小豬笑。佢地兩個真係好專業，用左好多方法引小小豬笑，又走嚟走去咁搵個最靚嘅位置嚟影我地。雖然我見唔到，不過小豬媽係前面睇到時，話見小小豬影相時都笑得好燦爛呀！
哈哈….依一PART 唔洗我地幫手，所以偷影左一張，睇吓兩位哥哥幾落力同小小豬影~
今日影嘅相雖然冇上次咁多，我地影左大約一個幾鐘，不過今次好玩好多，有攝影師哥哥教擺溫馨POSE，又有啲走嚟走去，所以當我地影完之後個人都勁攰。
嚟緊過兩日就可以去揀相，小豬媽有時都偷睇攝影師哥哥部相機，話整體上都應該比第一次去嗰間靚啲。
依家真係好心急，好想快啲到揀相日。不過我都會以平常心面對，因為『希望越大、失望越大』嘛，依句說話對我嚟講真係萬試萬靈呀…哈哈！
沒有留言:
發佈留言