過左小小豬一歲生日之後，又係時間去健康院打一歲針啦！
今日我地一早就去健康院，所以都唔算太多人，都唔洗等太耐就可以去磅重同見姑娘。
今次見姑娘除左問左一啲平日飲食同說話能力問題之外，仲做左手仔能力測試，整體上小小豬嘅表現都幾好，好多都部分都係合格，不過因為係拎起星星餅嘅測試入面，有幾次小小豬都係將手指公收埋，只係用食指嚟拎起粒餅餅。姑娘話為安全起見，叫我地兩個月後再去見佢地，睇吓有冇改善。其實我都唔覺得有問題，不過有人跟進吓都係好事，所以兩個月後又要返嚟啦！
之後我地就等見醫生，原本都唔需要，不過因為我地發見小小豬對蛋係有敏感，食完蛋之後都又會起濕疹，但今次其中有一支針係有蛋嘅成份，所以要見吓醫生睇吓打唔打得。 醫生問左小小豬嘅病徵之後，都係決定唔好打住，寫左封信轉介左我地去聯合兒科，到時再由佢地醫生決定。
原本我都唔願意，因為我總係覺得小小豬個情況唔係佢地講到咁嚴重，不過大肥豬話小心都係好事，所以就又要搵日去聯合啦！
由於有一支針唔打得，所以今次都只係打一支。依個小小豬一入到姑娘房，之後我將佢抱實係個心口時，佢就已經喊定先，不過我知佢喊唔係因為痛，係因為佢唔鐘意俾人捉住。當行出個房門時，已經冇喊，仲識得同大肥豬開心咁玩，真係俾佢激C呀！
原本都以為打完針之後就走得，原來我俾抽樣抽中去做中文大學有關流行性感冒嘅調查，所以又要等多一陣先走得。不過原來做問卷調查都有好處，就係佢地送左張COUPON俾我，真係好攪笑呀~
離開左健康院之後，大肥豬就即刻拎封轉介信去聯合排期。嘩....一排之下要去到九月底先可以去見醫生，真係誇張呀！
唉....依家真係唔知幾時先可以打到嗰支針，希望唔洗又要再等好耐啦，因為總覺得針係要跟進度嚟打，遲打真係怕會有問題呀！
沒有留言:
發佈留言