糖糖生日派對

13 AUGUST 2011(SAT)

因為小小豬尋日先打左針，所以我地都冇PLAN去邊度玩，打算乖乖地留係屋企。不過因為糖糖有啲嘢要拎俾我，所以就約埋小肥肥一齊上嚟我地屋企，俾嘢我之餘，當然係上嚟同小小豬玩啦！

睇吓，有人陪小小豬玩佢幾開心，仲傾盡所有玩具嚟招待兩位姐姐，真係何其莊觀呀~

剛好糖糖係下星期就生日，所以就買左個小小蛋糕，同佢預先慶祝生日~


 

食飽飽就繼續玩，依兩個姐姐真係教壞哂，教小小豬坐膠車。不過依個小小豬有新奇嘅玩意，當然玩得好開心啦~
 

雖然今日只係簡簡單單玩吓、食吓、傾吓，不過咁就過左一個好愉快晚上。

係度，老土啲都要再講：糖糖，生日快樂！又大一歲之餘又有一個新開始，之後嘅日子好事繼續會接二連三咁嚟到你身上，凡事在心中呀！