失敗的砵仔糕

23 MAY 2009 (SAT)

前幾日同大肥豬行過糕點鋪嘅時候，問我識唔識整砵仔糕。我之前都冇整過，所以就唔理佢繼續行啦！

哈哈....大肥豬都好少主動叫我整小食俾佢食，我次次整糯米滋、蛋糕仔，佢都係一粒起兩粒止。唔係我整得唔好食，只係佢唔太『好』依幾樣嘢食。

難得佢想食，我當然要試吓整俾大肥豬食啦，終於今日就整左我第一次嘅砵仔糕啦~

始終都係失敗左，食落個味係唔錯，大肥豬仲話有啲似街買嗰啲，但個質感唔知點解粉粉地，一啲都唔實。

我都已經照住個食譜嚟整，都唔知係乜問題，唉....望住依幾個失敗嘅砵仔糕，都攪到唔係幾開心呀！

不過...我唔會放棄，既然買晒材料，我一定會再試，希望下次成功啦！