影畢業相

終於都等到可以同大肥豬影畢業相啦！

雖然今日唔係正式行禮，只係係大學入面影相，但當我第一眼見到大肥豬著住成套畢業衫行嚟我身邊時，個心情都唔知點形容，有少少眼濕濕嘅感覺，但又唔可以表露出嚟.....真係有少少感動呀！

因為由佢打算計劃讀埋個大學課程，到開始讀書，之後考試....到最後終於畢業，雖然讀書嗰個唔係我，都總係感覺好似有我份咁。所以真係我仲開心過佢咁呀！

弊啦~~今日都攪成咁，到大肥豬正式行畢業典禮嗰日，見佢上到台嗰時，我真怕我自己忍唔到，到時真係失禮死人啦！

講番今日影相先，其實主要影相都係為左揀一張放入我地婚禮上成長MV嘅相(咁有紀念一定要放啦！)，所以就早左少少去影啦！

除左我之外，小豬媽同LULU妹都有去一齊影呀！原本我地都冇打算話要花花影相，不過小豬媽話影畢業相點可以冇花，所以小豬媽仲送左一扎花俾大肥豬呀！

今日真係影左好多相，真係要多謝小豬媽幫我地影左好多合照，係咁多張入面，我地就揀左依張放入我地成長MV入面啦！(因為貪佢有寫明年份同我地兩個都笑得幾開心，又好靚呀！

當然除左合照之外，大肥豬都影左好多相啦！佢平日都唔係太鐘意影相，不過今日成日叫佢行埋去地方影時，佢都冇意見，仲好乖咁笑得好靚呀！我諗今日係除左影結婚相嗰兩日之外，影得最多單人照呀！

最後我地當然影左一張大合照啦~~睇吓大家都幾開心！