黑仔王重現

都唔知仲乜，今日都唔係黑色星期五呀~~都唔知點解又真係黑成咁！

因為今日冇帶愛心飯盒，所以要行落去商場食lunch。點知當我行條必經嘅長樓梯時，行到一半，就...碌..碌..碌，碌左落樓梯。一路碌就用手係咁想找野扶，最後都碌左成小半條(嗰度都有十級八級)樓梯先識停呀！

碌停左之後，就好不顧儀態咁坐係樓梯度睇下自己個傷口。點知一睇，成對腳同對手都刮花晒，隻手同左右腳都分別流血呀！好痛好痛....痛到都企唔起身呀！

唔止呀~~我對手分別有帶玉鐲同水晶鏈，都係刮花左。同埋對鞋都刮花左呀！真係慘慘慘！好在就冇整爛到，如果唔係就傷上加傷呀！

之後就坐一陣，等個人定左之後就繼續行去。好在契大佬住得好近，所以我就上左佢屋企洗傷口啦！之後就去食lunch，不過真係好痛，冇心機食野呀！

唔知係唔係碌嗰時整到條頸同腰呢，依家依兩個地方越嚟越痛，好似俾人打左一身咁呀！今晚又要小豬媽幫我查藥膏先得啦！

不過..慘啦，明天有個好重要嘅節目，希望訓醒之後，條頸同腰都唔痛啦！仲有成對腳都刮花晒，都唔知點著靚靚裙仔啦！如果我明天唔係狀態，希望女主角唔好怪我啦！

都唔知我幾時先黑完~~