銀行戶口被凍結

都唔知係唔係黑仔運仲未過，尋日放工打算去櫃員機提款時，竟然唔俾我拎錢，仲寫左一包『所需服務已被取消，請與發咭銀行聯絡』。

睇見真係驚死呀！開頭都以為係張咭有問題，不過好奇怪..我係可以CHECK到 BALANCE，只係拎唔到錢。(小肥豬個戶口係非常清潔，入面仲有少少錢呀，絕對冇欠人錢呀！)後來就估可能係部機有故障，為怕會食咭，所以都冇再試啦！

今日返工前又打算去試吓啦，已經好醒目咁去左另一個櫃員機，點知都係出現同一個情況，今次真係驚啦，因為一定唔係係部機問題，即係我個戶口有事….真係都幾驚呀！所以一番到工就等到九點打去銀行問啦！

個職員CEHCK到我個ACCOUNT係冇問題，佢都唔知係乜事。諗諗吓就問我去邊個提款機同拎幾多錢啦！原來如果係其他『銀通』嘅提款機，係唔可以接取低過三百蚊，只可以係發咭銀行所提供的提款機先可以隨意提錢。

依樣真係未聽過哦，不過聽完之後都安心晒！

不過唔明點解銀行有新措施唔通知客戶，等人地驚餐飽呀！

開頭真係嚇死我呀！等我今晚放工再去試吓先得！