六年前嘅今日小小豬出世，真係又要講佢老土嘅說話「 時間過得真係好快」， 眨下眼小小豬六歲啦~
其實真係有啲難以相信小小豬已經六歲，可能我一日基本上全日對住佢，都唔覺得有啲咩大分別，裡裡內內仍然係好似個BB咁，仍然係一隻嗲嗲豬。
唯一明顯覺得佢有大個仔嘅表現，就係佢講嘢嘅能力， 因為你依家大個仔識駁嘴啦，佢嘅駁嘴並唔係要同我嗌交，係同我講道理， 務求以佢講嘅道理講贏我。
雖然有時佢嘅道理又真係有啲強詞奪理，有時都聽到我有啲忟忟地，暗地裏其實我都開心嘅，因為小小豬細個時候語言發展係比同齡弱，但依家識得表達自己既想法，又點會唔開心呀~
依隻豬仔真係可以話氹就氹C我，激又激C我， 不過依啲都係小朋友嘅特質，所以算啦慢慢努力，好好教依隻豬仔，等佢激我嘅次數少啲啦……哈哈~
現階段都唔望佢有啲咩突出表現，只望佢開開心心，健健康康咁過每一日， 我就已經滿足了~
嚟緊一大挑戰就係九月會升讀小學，係一個陌生嘅環境，加一個傻傻嘅小朋友，唔知會唔係點嘅呢？希望一切順利，小小豬可以好快適應小學生活， 繼續開心愉快咁返學啦！
**我地的FACEBOOK PAGE，齊齊來交流親子。育兒。烹飪啦**
沒有留言:
發佈留言