【對抗冷氣病】生薑紅棗杞子瘦肉湯

17 AUGUST 2016(WED)

今日等小小豬放興趣班時，上網見到有朋友仔介紹依個生薑紅棗杞子瘦肉湯，話可以對抗冷氣病。咁我見佢講嘅症狀小小豬又好似有有地，咁見又真係好易，所以就試下煲嚟飲啦~
 
其實咩叫做冷氣病？咪就係因為天氣熱，咁我地就會成日躲係冷氣房內，又食雪糕、生冷食物或飲品，咁就係對身體過度受寒，很易造成冷氣病。 

常見嘅症狀都好似感冒咁，都係流鼻水、手腳冰冷、疲倦等，不過只係冷氣房內先會明顯。我地一家三口都有鼻敏感，所以係冷氣房情況下就更加嚴重，見都係幾樣材料，所以就試下啦！ 

材料只係需要四樣，紅棗約20粒、杞子一湯匙、生薑三片、瘦肉約$30~
 
依四樣加埋一齊就對能滋養臟腑，滑潤肌膚，而且仲可以補中益氣。飲多啲就可以提升陽氣，兼能強化脾胃嘅湯水！ 

將紅棗去核切半；薑去皮切片；杞子浸洗備用~

 

瘦肉洗淨汆水，由於今次煲嘅時間唔需要太耐，所以將瘦肉切細舊啲，咁可以更加出味~ 

 

煲內放約2.5L水，然後加入薑片~ 

 

待滾起時，加入所有材料~ 

 

然後用大火加蓋煲約15分鐘~ 

 

再轉慢火加蓋煲多1小時~ 

 

最後加入少少鹽調味(真係少少好啦....因為太多會影響個味)，就可以飲啦~ 

 

其實煲嘅時候廚房充滿紅棗味，我都有丁點擔心個紅棗味太濃，個味會好怪怪的。但入口時又唔算太覺重味，清清地又唔錯哦~ 

 
雖然唔知係咪對冷氣病真有幫助，不過啲材料都係補血氣嘅，所以飲多啲都冇壞，尤其女仕們飲多啲都係一件唔錯嘅湯呀！ 

溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀。不過杞子就偏溫補，所以一般在沒有感冒情況下先可以飲用！

**我地的FACEBOOK PAGE，齊齊來交流親子。育兒。烹飪啦**