對上一次入海洋公園應該都係上年暑假，因為上年八月生日可以免費入場，即係買一張飛就可以一家三口入場(因為我同小小豬都係八月壽星嘛)，諗起都覺得好抵。
估唔到今年暑假又可以再次入場狂配，多謝海洋公園邀請，而且仲讓我地體驗「海洋快證」特快通行，今個行程仲唔係至快「趣」之旅~
如果唔係今次活動，我想我都唔知原來海洋公園推出左全新嘅「海洋快證」，一張快證可以自選7次特快通行服務。即係完全零排隊，真係可以話慳返好多排隊時間，即係可以係海洋公園玩更多遊戲啦。
坦白講.....上幾次入嚟海洋公園因為排隊都用左好多時間，所以真正玩樂時間都係唔多呀！
「海洋快證」可以係14項遊戲及設施中挑選7項使用，纜車及 海洋列車就可以來回使用，不過就當用左2個項目，所以用之前就要好好計劃下啦...哈哈~
今日我地仲約埋舅父、舅母同姨姨一齊，有咁多人陪小小豬玩，佢就緊係開心(因為咁多人俾佢點嘛)。原本小小豬係想玩夏水禮先，不過都係齊齊玩左啲刺激遊戲好似啱心水，所以大家就向高峰樂園進發。
我地第一個用「海洋快證」就當然係用嚟搭纜車，今日係星期日，估計輪候時間最少60分鐘，不我地出示「海洋快證」之後，真係可以話暢通無阻，完全「0」排隊就可以上到纜車啦~
熱帶激流都係一個好熱門嘅遊戲，我地直入式可以去玩，點知........原來都仲差好幾十CM，所以最後DADDY陪佢睇住我地玩。不過佢一啲都唔寂寞，因為佢排隊等到個射水槍，仲要好眼力地描準我地隻船上熟悉嘅人嚟射，就係咁.....我地就算有著雨衣都濕咁大半，依個小小豬真係愛我地啦~
接住我地又慳左45分鐘就可以嚟一轉極速之旅~
佢地兩分父子去玩攤位遊戲，一局都未完就可以同我地再匯合啦~
上幾次小小豬都好想去玩摩天巨輪，今次終於可以玩到啦~
不過可能係第一次搭，依隻大膽豬竟然識驚呀~
行過見到海盜船，老公竟然叫我陪佢去玩，今次有人幫我地睇住小小豬，所以兩公婆就嚟玩一轉。不過真係年紀大了，之前玩都真係唔會驚，點知今次只係坐中間行個心都離一離，睇嚟都真係唔玩得啦~
之後我地就先分開玩樂，舅父佢地就繼續玩刺激遊戲，佢地去左玩越礦飛車同滑浪飛船~
我地三口子就搭海洋列車落返山下嘅兒童王國俾小小豬放電~
自上次係MOKO同海綿寶寶玩過之後，小小豬都愛上左佢，見到啲海綿寶寶當然要影下先啦~
由於夏水禮活動進行緊，所以係兒童王國就有好多姐姐陪小朋友玩水槍，依個小小豬有得玩就咩到得，仲大膽到用水槍射我地添~
係兒童王國仲有一個沙堡俾小朋友任玩~
一向小小豬都鐘意玩沙沙，有得玩佢又點會放過呀~
我地係兒童王國玩左一陣，我地就匯合姨姨一齊向海綿寶寶夏水禮出發啦~
小小豬等左咁耐，終於恨到去玩水，仲唔即刻走去換戰衣出發玩餐飽~
依隻豬仔一支箭就衝左去玩水~
之後就到佢期待好耐嘅泡泡池，上年因為未夠高所以唔玩得，今年終於夠高可以入去玩啦~
睇佢係泡泡池入面周圍走，就知佢又幾開心啦~
當然唔少得個大水筒，不過好明顯隻豬仔係有啲驚，即係.....又想玩又要驚，真係俾佢笑C呀~
來來回回係個夏水禮入面小小豬都唔知玩左幾多十次，不過我地之前玩其他遊戲都慳左好多時間，所以就俾佢慢慢玩啦！
正當我地係夏水禮玩得非常興奮之時，小小豬離開時就仲開心，因為舅父趁我地玩緊嘅時候，去左玩攤位遊戲，經佢嘅努力，終於嬴到隻PEPPA PIG俾小小豬，有佢至愛.....仲點會唔開心呀~
我地玩左一整日，真係既滿足又勁攰，不過係走嘅時候，我地發現左一件九龍人驚喜，就係有免費旅遊車可以去到旺角MOKO。嘩...既免費又可以一程車出到旺角，真心覺得十級正呀~
開心輕鬆又玩左一整天，今次可以話係嚟咁多次海洋公園玩得最多嘅活動之一，「海洋快證」真係一個想瘋狂玩樂嘅唔錯選擇呀！
More Information :
「海洋快證」可用於七個指定機動遊戲及設施
價錢 : HK$150 (成人與小童同價)
購買地點：公園入口處票務部、歷奇百貨、北極購物村、熱帶雨林禮品店、海洋金銀島
網上購買：https://ticketing.oceanpark.com.hk/oceanpark/b2c/index.cfm/fastrack
Website：http://www.oceanpark.com.hk/
Facebook：https://www.facebook.com/hkoceanpark
**我地的FACEBOOK PAGE，齊齊來交流親子。育兒。烹飪啦**
沒有留言:
發佈留言