【生日澳門之旅】房間大解構及百老匯奇幻Show

26 AUGUST 2016(FRI)

我地同兔斯基影完相之後，小小豬已經急不及待嘈住要去房間，當然啦...因為跳床係佢其中一個期待節目嘛~

真係唔明白點解小朋友咁鍾意跳床，或者正正係因為屋企唔可以做，一到旅行時就來個大解放。唉…算啦，小朋友係要盡情去玩㗎嘛！

一去到所屬樓層，小小豬已經飛奔去搵我哋嘅房間呀~

 

房間都算幾大，而且個環境都好舒服~  

 

酒店都提供咗一啲飲品同食物， 原來澳門銀河酒店有一樣好好嘅安排，就係飲品食物第一次係免費，如果有需要添置先另外收費呀~

 

跳完床嘅小小豬就坐定定欣賞風景~ 

 

有我地係31樓望出去，可以望到官也街一帶嘅風景，又真係好靚哦~

 

休息過後我地又繼續出發，齊齊去睇「百老匯奇幻Show」~

 
依啲表演初時都好擔心小小豬唔啱睇，要佢乖乖坐定定45分鐘欣賞，對一向坐唔定嘅佢嚟講，其實都真係幾難。

坦白講，初初嘅歌舞表演雖然都幾精彩，不過就唔太啱小小豬口味，佢都不停問我幾時做完~

 

不過，一到啲魔術表演時，佢嘅精神就返晒嚟。 好似依個表演者佢可以將自己個頭轉移到肚腩，小小豬不停問我點解~

 

另一對表演瞬間換衫，小小豬同樣不停問點解~

 小小豬金睛火眼咁睇到實一實，仲幫我數住佢地換左幾多套衫添~

 

依兩位穿上雪屐嘅表演者真係睇到我自己嘩嘩聲，著住雪屐嘅同時仲可以用自己條頸嚟做支撐，另一位就係度不不轉轉轉，我睇到都有啲驚呀~ 

 

最後一部分亦都係我地大家都覺得最精彩一部分，表演利用光與影再加上少少特效，上演一場鐳射舞，好睇指數真係直迫十粒星星呀~ 

 

由初時嘅擔心到最後拍手不絕，表演真係好好睇，絶對一份喜出望外嘅感覺呀~

 

節目完結時小小豬就俾左個大驚喜我，就係我鞋帶甩左，小小豬見到就即刻捉我埋一邊，仲主動幫我綁鞋帶，嗰一刻我真的冧C左啦~ 

 

最後我地當然唔少得同表演者來一個合照留念啦~

 
睇咗一場咁精彩嘅表演，又係時候要去搵食啦，我地一行六人就浩浩蕩蕩去食Buffet啦！

**我地的FACEBOOK PAGE，齊齊來交流親子。育兒。烹飪啦**