【生日澳門之旅】豐富自助晚餐 及 驚喜蛋糕

26 AUGUST 2016(FRI)

玩左大半日，係時候要醫下肚，難得去玩緊係要食好啲，所以我地就齊齊去自助餐人氣王「名廚都匯 Urban Kitchen」嘆大餐啦~
 
唔知點解小小豬係好鐘意食自助餐，其實佢可以食嘅嘢又真係唔多，可能就係因為可以自己出去拎想食嘅嘢，有多點自主權(即係食多啲雪糕)，所以特別興奮！(利申:我一向都有俾小小豬揀佢鐘意食乜，只係生冷嘢有限制咋) 

我地一睇完「百老匯奇幻Show」，兩個小朋友都急不及待跑住去搵自助餐餐廳~

 

哈哈哈...佢地兩個仲急急腳入去問職員我地位置添~ 

 

安頓好之後我哋就去搵野食， 好多生蠔每一隻都好新鮮，而且仲源源不絕， 我自己一個人加加埋埋都真係食咗個過20隻，抵返晒呀~ 

 

另外，佢啲海鮮冷盤都好多樣化， 我個人就鍾意食佢嗰個蜆同龍蝦，啖啖肉好好味呀~ 

 

另一推介就係佢個鮑魚海參泡飯，每一碗都會有鮑魚同海參呀~ 

 

除咗冷盤吸引，熟食都有好多唔同種類， 我都掛住食唔記得續樣影，每款個水準都唔錯㗎~

 

我地一致認為最吸引嘅熟食，就係依個片皮鴨。佢一啲都唔油膩，仲可以睇住師傅即叫即片添~

 

我幾欣賞將冷盤、生果同沙律菜放雪櫃入面，咁就可以長期保持衛生啦~ 

 

小小豬都不知幾興奮，每次拎一兩樣野食， 來來回回都唔知行左幾多次。不過算啦，自助餐係要行下先開心㗎嘛~ 

 

我當然唔執輸啦，勁食刺身同生蠔，真係十級滿足~ 

 

甜品都有好多唔同嘅選擇， 女仕們係有兩個胃嘛。見到咁多靚嘅甜品真係花多眼亂， 所以我都真係食唔笑少呀~ 

 

除左食之外，仲有好多唔同種類嘅果汁任飲~

 

當然小小豬最期待嘅一環節，梗係就係食雪糕。 有得自己吱軟雪糕，仲唔係啱曬佢~

 
認真，今次真係我食自助餐計，食得最多嘢嘅一次，從未如此瘋狂過。一個開心既時候，胃口特別大，食得多嘢都正常啦。 最多食完先減肥啦！

食完一個豐富嘅自助餐，返到酒店仲有一個大驚喜。原來生日日入住酒店，係會有一個生日蛋糕送㗎， 所以我地又多左一個生日慶祝活動~

 

我有咩願望？其實好簡單……只要我們一家健康快樂，小小豬快啲適應小一生活，咁就夠了~

 
玩左成日都真係攰攰地，我地就早啲實休息，抖足精神迎接我地最期待嘅水上之旅啊！

**我地的FACEBOOK PAGE，齊齊來交流親子。育兒。烹飪啦**