【跟住肥媽食平D】黃瓜薏米螺頭瘦肉湯

15 AUGUST 2016(MON)

實不相瞞... 實我依個師奶仔真係好鍾意睇肥媽煮食個節目，因為日日諗煮乜真係好頭痕，依家跟住肥媽煮就得下，仲唔係十個正！

睇左一個星期，都計劃跟煮幾個餸，不過上星期見到依個黃瓜薏米螺頭瘦肉湯，有我鍾意嘅黃瓜，冇辦法就決定打尖煲依個先~
 
我鐘意食黃瓜係其中一個原因，另一個原因就係屋企現成有材材，只係買瘦肉就煲得，咁仲唔即刻快手煲呀！
基本上我都係跟住肥媽食譜嚟煲，唯
一唔同就係肥媽係用急凍螺頭，我就改用乾螺頭，因為我之前買左乾螺頭仲有幾粒係度，我諗大家都係螺頭，功效都應該差唔多，所以試下啦。(用晒屋企現有嘅就唔洗去買...可以慳DD嘛)

材料包括有黃瓜一個、薏米半碗、乾螺頭6粒仔(肥媽用急凍螺頭2個)、瘦肉及薑幾片~

 

乾螺頭及薏米先浸水，最好就要浸起碼一小時~ 

 

瘦肉洗淨汆水備用，薑去皮切片~ 

 

黃瓜去籽切塊，切大舊啲都唔怕，因為太細煲完湯就冇得食啦~ 

 

煲內放約3L水，水滾後放入所有材料(黃瓜除外)，待再次滾起時，用大火煲約15分鐘~

 

然後加入黃瓜~ 

 

用大火煲約15分鐘~ 

 

再轉慢火加蓋煲1.5小時~

 

最後加入少少鹽調味，就可以飲啦~ 

 

千其唔好漏左啲我至愛黃瓜，啲湯料又可以當一個餸，真係啱晒我依個師奶仔呀~ 

 

其實真係有啲估唔到啖湯係咁好飲，完全冇加蜜棗/無花果依啲調味材料，都係非常清甜呀，肥媽真係冇介紹錯呀~ 

 
今次老公大讚話好飲，仲叫我跟住肥媽再煮多啲新款，俾多啲新意佢哦。真係俾佢激c。不過....肥媽啲菜式簡單又易煮，所以我都唔介意跟住煮呀....哈哈哈！

溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！

**我地的FACEBOOK PAGE，齊齊來交流親子。育兒。烹飪啦**