其實我都係比較怕去人迫迫嘅地方，花市對我嚟講都真係有啲怕(可能係有一次慘痛經歷)，所以小小豬咁大個仔都未去過花市。
不過，今年有啲唔同，因為我好想去買一盤水仙花，再加上小小豬學校都有教花市係啲乜，所以就早少少去花市同佢行一轉啦~
我都唔敢行維園了，近近地嚟觀塘花市都係一個唔錯選擇，我仲揀係兩點幾嚟，一定唔怕人迫人啦！
由於我主要目的都係打算買水仙花(屋企擺水仙係旺夫，我緊係要買盤返屋企旺下個米飯班主啦...哈哈哈)，所以先同小小豬去行下個濕貨市場。
依個每事問嘅小小豬見到唔同種類嘅年花時，都極度唔怕醜咁問店員嗰啲係咩，幾時要淋水.....幾時會開花，佢嘅主動都令我有點兒尷尬。
好在當時人流唔算太多，各位店員都同好有善地回答小小豬，仲同佢有講有笑，真係令我對行花市有好大改觀呀~
見到棵桃花仲攬到實，唔通小小豬想行返個桃花運..哈哈哈~ 
行左一轉濕貨市場，當然係要帶小小豬去行下乾貨區，睇下有咩特別新款特別嘢啦！
一啲好特嘢東東就唔多見到(可能去晒維園啦)，不過在場所見好多攤檔都係由中學生去處理，同埋有好幾檔都係一啲玩遊戲贏獎品，有啲又擺晒啲玩具俾小朋友任玩。
有得玩小小豬又點會放過，每個攤檔都玩一陣啦~
見到依個蛋撻仔，小小豬竟然想影相哦~ 
為食豬見到嘢食就嚟得特別興奮，見到冰糖士多啤梨又有得食，冰糖再加士多啤梨又好似幾好味。見小小豬食得咁滋味，等我又研究下點整先~ 
第一次行花市對小小豬嚟講一定係一個美好回憶(緊係啦...有嘢食又有嘢玩，仲要有人俾佢問問題)，佢仲講明年都要再嚟行花市添。哈哈哈...明年....等我揀個唔多人嘅時間，考慮下先啦！
沒有留言:
發佈留言