情人節兼人日小慶祝

14 FEBRUARY 2016(SUN)

今日話晒都係情人節兼係初七人日，咁都要同小小豬攪攪新意思，係我地買餸時見到APPOLO有個小雪糕蛋糕，所以就買嚟做個小慶祝啦~

坦白講節日對於我地一家嚟講都唔太著重，因為如果一家開心的話，日日都可以係情人節啦！所以我地都冇刻意買禮物...訂餐廳食好嘢，總之我地三口子齊齊整整就足夠。

不過，今日既然係情人節兼係初七人日，咁係買完餸路經APPOLO有啲細細粒嘅雪糕蛋糕，見到都只係$38，又唔算好貴，所以就買個返屋企同小小豬嚟個開心下午茶啦~

依個小雪糕蛋糕好似叫『紅粉天使』(係小小豬話佢記得個名，我買嘅時候完全冇留意添)，依北海道雲尼拿牛奶雪糕再加士多啤梨雪糕，睇個外觀都幾靚呀~

切開嚟睇，原來係以雲尼拿牛奶雪糕為主，外層就包住粉紅色嘅士多啤梨雪糕~ 

味道方面我就覺得麻麻地，個士多啤梨味唔太重，基本上都可以話食唔出個味。不過入面嘅雲尼拿牛奶雪糕就有少少驚喜，佢個嗰份牛奶味都算香濃，所以整體上都算合格啦~

對於為食嘅小小豬嚟講，有得食雪糕佢已經不知何其興奮，佢仲食得不知幾狼C呀...哈哈哈~

平平地一個普通雪糕蛋糕，就足以令小小豬開心一個下午，所以話小朋友其實只要做佢鐘意，真係咩都會開心啲！

我見APPOLO仲有幾款唔同嘅雪糕蛋糕，有機會等我再買過同小小豬齊齊開心一返啦！

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！