蓮藕排骨湯

26 FEBRUARY 2016(FRI)

係唔知邊次嘅晚飯途中，老公講話如果有蓮藕湯飲就好啦！既然佢開到口，我當然完全冇問題，跟之前暖DD肥媽個食譜，煲個蓮藕排骨湯，做個乖乖老婆啦~

其實想煲好耐，不過成日行街市都唔見到蓮藕，終於今日見到肥嘟嘟嘅蓮藕，所以就可以煲啦！　

蓮藕兩粒、排骨約$40、眉豆三湯匙~

 

蓮藕去皮洗淨切大件，排骨洗淨汆水，眉豆洗淨略浸~

 

將3L清水燒熱，然後放入所有材料~

 

先用大火煲半小時~

 

然後再轉細水煲一小時~

 

最後加少少鹽調味就飲得啦~

 
滿心歡喜打算俾個驚喜老公，點知佢第一句竟然係話...點解同我飲開嗰啲唔同(好明顯佢係講緊奶奶煲嗰啲啦)？

聽到嗰刻心情都有啲DOWN DOWN地呀，不過係幾秒之後心情又有點唔同，因為老公竟然話...幾好飲哦，都有啲驚喜，下次奶奶嚟煲依個俾佢飲啦！

對住我依個口話冇要求但內心深處有意見嘅老公，我嘅心情又點會唔似坐過山車呀。不過見佢好滋味咁食晒啲蓮藕同排骨，又飲晒我啲湯，都真係幾有滿足感呀！

相信每一名煮婦都明白我依個心情，有咩開心興奮過有人欣賞個完成品呢，依啲亦都係我越嚟越鐘意湯嘅原因。

**我地嘅FACEBOOK FAGE，唔知大家LIKE左未呢？**
 小小豬的成長日誌
大家一齊嚟交流下煮飯仔及去玩嘅親子樂啦！