雙蛋蒸豬肉

26 FEBRUARY 2016(FRI)

今日除左煲蓮藕排骨湯俾老公之外，仲應老公提意煮左雙蛋蒸豬肉添~


哈哈哈..成日要諗煮餸都真係幾煩，有時係街市行幾個圈都唔知買咩餸，所以有人提意煮咩餸，緊係煮啦，諗少好多嘛！

原來依個雙蛋蒸豬肉都真係幾易，簡單雞蛋2隻、鹹蛋1隻同埋碎豬肉約15蚊就得，真係既簡單又經濟~

 

將少少老抽、生粉同埋芝麻油加入碎豬肉調味~

 

將2隻雞蛋及1隻鹹蛋白打成蛋液，加入碎豬肉伴勻~

 

最後將已調味嘅肉碎倒入碟中，然係加入鹹蛋黃粒~

 

待水燒熱後，用中火蒸約20分鐘~

 

蒸熟晒就食得啦~

 
煮好第一時間就緊係即刻問老公意見，佢話OK啦...驚喜就唔算有，不過就比起茶餐廳好食啲囉！

聽完真係唔知好嬲定好笑，竟然拎我啲餸同茶餐廳...。不過，依個煮簡單又易煮，有時快快地煮依個餸都不失為一個唔錯選擇。

**我地嘅FACEBOOK FAGE，唔知大家LIKE左未呢？**

小小豬的成長日誌
大家一齊嚟交流下煮飯仔及去玩嘅親子樂啦！