Hello Kitty Secret Garden

4 JUNE 2014(WED)

早排成日係FACEBOOK見到話大坑將會開設一間HELLO KITTY CAFE，仲會係六月一日開張，見啲相片介紹都覺得好靚，都真係勁想去呀！

所以趁今日帶左小小豬返學之後，帶埋小豬媽一齊去Hello Kitty Secret Garden歎吓下午茶啦~

估唔到HELLO KITTY真係魅力沒法擋，正當我以為我地兩點幾嚟，已經過晒LUNCH HOUR，應該唔會太多人。點知我地一去到就已經見到有大約廿幾人排緊隊，真係有啲驚訝。

點解咁多人排隊，原來大家都應該都係嚟探一探依個新潮點之外，Cafe入面都只有四張枱，大約廿多個座位。雖然排隊又真係幾慘，不過Hello Kitty Secret Garden裝飾又真係非常精緻，好多KITTY佈置呀~

未排隊時先嚟影個外觀相先~

雖然大家都係度排隊，不過負責人都好細心，先為安排我地係一個唔太晒嘅地方，又安排一啲椅子俾大家坐住等~

之後仲拎左啲冰凍蘋果茶俾我地飲，好讓我地可以解解暑添~

係排緊隊之際，我就爭取時間，先入去CAFE影吓啲靚靚蛋糕先，真係件件都好靚，好想食晒佢呀~

經過大約一個鐘嘅排隊時間，我地終於有位，可以入去食嘢啦！

當然第一時間就周圍影相啦，全店都真係遍佈HELLO KITTY，好似枱椅、盆栽擺設、糖鹽樽，總之就係 KITTY包圍你，勁靚呀~

由於我地都係食下午茶，所以都係少少地ORDER兩杯飲品、一份麵包同一件靚靚蛋糕啦！

士多啤梨冰~

芒果冰~

藍梅CAKE~

吞拿魚三文治~

啲三文治都印左KITTY頭呀~

睇我同小豬媽都食得咁開心就知啲嘢真幾好味啦~

就連咭片都可愛過人呀~

正當我地食飽飽之際，見外面都仲有好多人排隊，所以都唔坐太耐，留返俾其他朋友仔享受HELLO KITTY進餐，所以我地就埋單走人啦~

當然我地個活動又點止咁少，食飽飽之後當然係到我地影相時間啦！

入嚟Hello Kitty Secret Garden食嘢嘅朋友，都可以問場內職員借個KITTY框影相(大家如果去食記得問佢地借呀！)。

我地當然唔放過，問職員借嚟影吓啦~

影完KITTY框框又繼續不停影影影啦~

其實餐廳內都仲有好多以KITTY樣做嘅食物，我見隔離枱ORDER左KITTY頭太陽蛋漢堡包、KITTY拉花咖啡、仲有KITTY PIZZA，見到都好吸引，有機會都可以再嚟試多其他款式。(不過...真係可能要過一段時間，等個熱潮減退少少先，因為大熱天嚟排隊都真係幾慘呀！)