探索科學．創藝坊

25 MAY 2014(SUN)

首先要謝謝科學園嘅邀請參與「探索科學．創藝坊」活動，今次都係我地三口子第一次嚟，第一時間當然要係個地標下留個紀念先啦~

其實由今5月18日開始至6月29日，逢星期日係科學園金蛋下嘅活動室進行。都會舉辦「探索科學．創藝坊」完全係一個免費又好玩嘅活動，透過四個不同活動，結合科學與藝術的工作坊，讓大家對科學加添認識外，仲俾機會大家一展創意~

由於我地早左嚟到，所以就先係金蛋下休息一陣影吓相先~

見活動室內有小丑同大家玩，小小豬當然唔放過機會，乖乖排隊同小丑玩之餘，介拎個汽球槍玩吓啦~

等左一陣，我地開始今日嘅「探索科學．創藝坊」活動，第一站就係去玩Art Jamming~

首先大會負責人為我地安排好位置之後，就開始向我地介紹各畫具~

大會為各大小朋友提供一啲與科學或自然生態有關嘅圖片，等我地可以參考畫係個畫布內。小小豬揀左好耐，終於揀左一個太陽花景~

負責人為各小朋友戴上圍裙，就可以開始Art Jamming啦~

去拎啲顏料先，依啲顏料用濕紙巾一抺就甩，完全唔驚會整污穢手腳，所以都完全好放心俾小小豬自己畫呀~

個傻豬仔仲係度都DADDY畫圖畫添~

小小豬又幾專心哦~

雖然之前小小豬係揀左幅太陽花，不過完成大傑作就變左.....我都唔知係乜啦！其實對一向唔多鐘意畫圖畫嘅小小豬嚟講，可以專心乖乖地完全左一個作品(仲要冇空白地方)，都已經係好叻仔，所以我都好滿意佢今次係個大作品，返到屋企一定要貼堂呀~

第二個站就係T-Shirt創意絲印工作坊~

揀好衫之後，可以揀自己鐘意嘅圖案同顏色，以絲印方法印係件衫上面呀~

我地都好留心聽負責人講解呀~

睇吓小小豬幾落力~

完成，小小豬件TEE靚唔靚呀~

接住我地就去玩動感3D畫作~

係畫紙上填上顏色，再配合智能平版設備，令平面物件變成栩栩如生的動畫啦~

雖然小小豬隻小鳥又真係花貓貓左啲，不過見到個立體動畫時又幾得意哦~

其實除左有四個大型活動之外，場內都有啲小攤位，除左小丑派汽球之外，都仲有依個融入科學嘅遊戲 - 轉轉碟~

轉轉碟成功轉到個碟的話，就有特別版汽球。我地當然都有玩，不過就唔成功呀~

係未到預定時間玩第四個活動時，我地就自由活動一吓，所以就先帶小小豬去玩彈彈床呀~

洗乾淨手仔就乖乖坐定定等入去玩~

每一節大約玩5分鐘，小小豬當然係爭取時間不停玩啦~

由於我地只有一小時多嘅自由時間，所以俾小小豬玩左一轉彈彈床之後，我地就去食個下午茶休息一陣，之後就繼續返去玩活動啦！

最後一個活動就係趣味科學藝術工作坊，其實依個活動就係主要介紹聲音，小朋友跟住老師講解，做出兩個小工具，來作發出聲音嘅實驗 ~

老師首先用教我地用間尺發聲音~

然後教我地做用杯同繩及濕左水嘅膠套，做出"吱吱"聲~

小小豬聽到自己整出嚟嘅"吱吱"聲幾開心~

第二個小實驗就係自制喇叭，小小豬都有好認真咁幫手整呀~

哈哈...完成，真係吹得到聲呀~

玩晒「探索科學．創藝坊」所有活動之後，見時間尚早，加上小小豬今日都算幾乖乖合作，所以又再帶佢去玩彈彈床啦！由於我地依個時段都冇乜人，所以負責人都冇限時，唔覺唔覺小小豬係入面都喪跳左成大半個鐘呀~

如果唔係PR姐姐嘅邀請，我都唔知原來科學園舉辦左一個咁好玩嘅節目。節目豐富就唔在講，最重要就係費用全免，畫板、TEE、仲有彈彈床都是免費供應，所以一定要大力推介比大家呀！

今次都係我地第一次入科學園，原來依度個環境好正，又有戶外又有室內，便利店食店都有好多，所以都好啱入去玩。經過今日之後，大肥豬已經話左搵日帶埋單車同泡泡槍，入嚟玩多轉呀！

 

More Information :
Website：http://www.hkstp.org/zh-HK/News-Media-Events/Events-Seminars/2014/Explore-the-Art-of-Science.aspx#.U41Zm3Z-WNh
Facebook：https://www.facebook.com/HongKongSciencePark