Hape 玩具派對

8 JUNE 2014(SUN)

首先非常感謝Hape嘅邀請，我地今日三口子上左佢地嘅SHOWROOM參加玩具派對，小小豬同小朋友一齊玩左好多唔同種類嘅木制玩具遊戲呀~

其實Hape嘅木制玩具我之前都有聽過，但就因為成日行過百貨公司都係見到啲比較細嘅串串珠遊戲，所以我就誤會左Hape嘅玩具只係俾口啲細細個嘅小朋友玩。

不過，今日嚟參加依個玩具派對之後，真係更正左我依個錯誤想法，因為原來Hape嘅木制玩具真係好多唔同種類，完全係適合任何年齡嘅小朋友，就連我地大人都好啱玩添呀！

Hape係德國名牌木質玩具製造商，佢地對玩具嘅製作材料都好注重，挑選無化學物料嘅材料，令家長可以好放心俾小朋友玩，就算唔小心放入口都唔會有危險呀！

小小豬一踏入個SHOWROOM，就已經極度興奮，因為有好多玩具擺放左係度呀~

依個貪玩嘅小小豬當然急不及特走去玩啦！

先嚟玩吓近期至愛嘅煮飯仔先。場內有唔同款式嘅廚房套裝，小小豬都不知幾開心呀！

依套廚房套裝就連門市都未推出，我地可以優先試玩呀~

唔止個廚房吸引，啲玩具食物都好靚，小小豬仲話要整PIZZA俾我食添~

嘩...有壽司食呀~

我自己就超級鐘意依套粉紅色廚房呀~

玩完廚房就渣車車先，依部雙人單車真係好啱親子活動呀~

哈哈哈...唔止小小豬玩得開心，就連大肥豬都拎啲玩具玩埋一份呀~

小小豬又嚟扮吓小小音樂家先~

仲有小型波波池玩添~

玩左一陣，其他小朋友都已經嚟晒，我地可以開始玩遊戲啦！首先就係自我介紹，介紹完仲可以得到一份小禮物，多謝呀~

之後就到第一個遊戲，就係將啲動物積木放入波波池，之後根據遊戲姐姐指示砌返個圖案~

哈哈...小朋友就當然係掛住玩，都係我地家長負責砌圖案，不過各位媽咪都砌得好投入哦~

雖然唔係第一名，不過總算成功砌到個圖案啦~

第二個遊戲就係搵糖糖，小朋友擲顏色骰仔，根據骰仔擲出嚟三種顏色，就搵返相同顏色嘅糖糖。真心覺得依個遊戲好好，既可以訓練小朋友嘅專注力，又可以訓練觀察力同速度~

搵到啦~

最後一個遊戲就係用依啲小工具，聽遊戲姐姐指示，行去指定嘅英文字母上面，又係一個可以訓練小朋友專心嘅遊戲~

玩完遊戲之後，遊戲姐姐叫各小朋友渣車車，帶我地去另一個地方玩~

嘩...唔止係小朋友，就連我地大人個個都叫到嘩嘩聲，因為帶左我地去另一個SHOWROOM，入面有好多玩具呀~

仲擺左好多玩具，真係非常吸引呀~

Hape除左木制同竹制玩具之外，仲有沙灘玩具添~

有咁多玩具，各位小朋友當然唔放過依個咁好機會，不停玩玩玩啦~

正當各小朋友玩得興奮之餘，我依個大朋友都玩埋一份~

好大個機械人呀~

玩完之後我地又渣車返回原來遊戲地方~

原來遊戲姐姐好細心地已經為我地準備好茶點啦~

有得食小小豬當然係最開心啦~

食飽飽休息一陣，又可以繼續玩。小小豬真係好鐘意嗰個停車場，佢仲請哥哥拎嚟俾佢玩呀~

小小豬真係好鐘意依度，玩到活動完左都仍然係繼續玩，仲玩到唔捨得走呀！

雖然哥哥姐姐都俾好歡迎佢地留係度繼續玩，不過我地都打擾左好耐，所以都係時候要同啲玩具SAY GOODBYE啦~

真係好多謝Hape今日嘅邀請，為我地安排左啲咁好玩嘅遊戲同接待，仲送左份好豐富嘅禮物俾小小豬呀~

我家嘅教育部主管大肥豬試玩完之後，都話啲玩具真係唔錯，好多都好益智，可以係玩之餘都有得著，所以佢話都已經睇中左幾樣，尤其係啲啱親子一齊玩嘅遊戲，有機會一定要買嚟同小小豬一齊玩呀！ 

之前問過負責人，點解係坊間唔係好多地方有得買Hape玩具？佢地話因為Hape玩具都比較大件，所以就只可以因應嗰區需要擺放唔同種類玩具。

不過，因為依家佢地同周家蔚合作，係周家蔚所開嘅童裝店- THE 7th DAY，有差不多200款Hape產品發售。除左有得買之外，仲擺放左玩具俾小朋友玩添呀！

睇嚟我都要搵日帶小小豬上去玩返轉，順便買吓玩具先得啦！

 

More Information :
Website： www.hapetoys.com
Facebook：https://www.facebook.com/Hapetoyshk?fref=nf