紅菜頭湯

24 JUNE 2014(TUE)

話說前幾日姨媽嚟探小豬媽嘅時候，買左好幾個手掌咁大啲紅菜頭俾小豬媽煲湯飲。啲紅菜頭真係好大粒，所以今日就嚟煲個既簡單又好有益嘅紅菜頭湯啦~

其實我地之前都唔識煲紅菜頭湯，唔好話煲就連聽到好少聽，係小豬媽針灸嗰位醫師介紹，我地先識煲依個湯。

原來一個簡單嘅紅菜頭，佢嘅功效都好廣，可以補血養顏、護肝排毒。真係任何人都可以飲，連小朋友都可以飲呀！

材料都係非常簡單，只係一個紅菜頭(如果係普通街市冇大嘅，就可以用兩個細代替)、番茄五粒、薑兩大舊~

先將紅菜頭去皮切塊，成個紅菜頭都好有營養，所以啲葉同莖都一樣可以拎埋嚟煲湯呀~

番茄切開四件~

薑連皮切開一半，之後拍鬆佢備用。其實薑係可以因應個人口味加減，由於我鐘意薑嗰種辣辣地嘅口感，所以先咁多啦~

隨水將紅菜頭及薑放入煲內開始煲~

煲左大約二十分鐘之後，就可以將蕃茄加埋入去煲~

最後再用中火煲多大約四十五分鐘，之後落少少鹽~

一個簡單又有益嘅紅菜頭湯就完成，除左可以有湯飲之外，啲湯料都一樣可以食呀~

老實講，依小豬媽開頭煲嗰幾次，我都唔多肯飲，只係好勉強咁飲左一碗，因為都真係唔多習慣飲咁"紅"嘅湯。不過飲多幾次，又發覺又真係幾好飲，加上又可以排毒咁有益，所以依家每次煲嘅時候我都會自動自覺咁大大碗飲幾碗呀！

其實好多朋友都有加埋肉嚟煲，不過針灸師話最好有營養就係只落依幾樣簡單材料，有需要時就加埋紅蘿蔔同粟米就得啦！