愛心木瓜魚湯

7 OCTOBER 2013(MON)

斷斷續續病左成兩個幾星期，真係攪到大肥豬都冇啖好食(放心...小小豬仍然係大魚大肉呀)！

趁有返少少精神，煲個靚湯-紅衫魚木瓜湯，慰勞一吓大肥豬。不過大肥未飲，就已經俾小小豬飲先啦~

小小豬都真係飲依個湯大，就係佢仲係我肚入面時，我真係一個星期飲兩三次，因為小豬媽話魚湯有益，我又覺得好飲，所以大肚時就成日煲啦！

先燒熱鑊加小量油，將魚煎香，煎耐一點噂魚味會出啲呀~

之後加約一公升水，然後蓋上蓋開大火煮到至湯為奶白色~

隔開魚肉魚骨~

依個步驟可以重覆做多一次，咁就可以多啲湯飲啦！

再加入薑同已汆水嘅豬展肉落去魚湯入面，再煲約四十五分鐘~

最後放入木瓜~

加鹽煲大約二十分鐘，直至木瓜煮熟~

一碗好味嘅木瓜魚湯就完成啦~

睇吓小小豬飲得幾滋味就知道依個湯係好飲啦~

其實如果唔鐘意食木瓜，可以改用蕃茄薯仔、節瓜或者冬瓜等蔬菜，都一樣咁有益同好飲呀！

依個湯都算簡單易煲，所以大家有興趣都可以試吓煲嚟飲呀！