鋼琴高手

23 JUNE 2011 (THU)

由小小豬未出世嘅時候，大肥豬都成日嘈住話要買個琴，因為佢話要培養小小豬嘅音樂天份(不過其實係大肥豬想玩琴就真...哈哈哈)。當時小小豬都未出世，所以我一直都冇理到買琴依個建議。

直到依家小小豬已經十個月人仔，大肥豬又再同我傾買琴依個問題。

其實我都好同意俾小小豬玩琴，可以陶冶性情嘛！不過依家小小豬都仲係好細個，唔知佢對彈琴有冇興趣，好驚我地買左個琴返嚟之後，到佢大個啲就唔鐘意，咁咪好似浪費左。

最後我同大肥豬就決定，依家先買個玩具琴仔等小小豬玩吓睇吓佢對依方面有冇興趣。如果係就等佢大到幾歲就真真正正買個琴，同帶去琴行度學琴。

講左到唔夠一星期，大肥豬就急不及待買左個玩具琴仔返嚟啦~

一見到個琴仔，小小豬就勁興奮，仲好叻仔咁唔洗教就識得按啲琴鍵發聲，仲扮到成個鋼琴高手咁係度自彈自唱呀~

睇小小豬今日第一次玩個表現都應該幾鐘意個琴仔，真係又係時間開始儲定錢等佢大個時去學彈琴啦！